ஆஸ்திரேலிய மைதானங்களில் பந்து ஸ்விங் ஆகவில்லை என்றால் புவிக்கு சிக்கல் தான்: வாசிம் அக்ரம் சொல்கிறார்

லாகூர்: பாகிஸ்தான் கிரிக்கெட் அணியின் முன்னாள் கேப்டன் வாசிம் அக்ரம் அளித்துள்ள பேட்டி: இந்திய அணியின் வேகப்பந்து வீச்சாளர் புவனேஸ்வர்குமார் புதிய பந்தில் நன்றாக பந்துவீசுகிறார். ஆனால் அவரது வேகத்தில், பந்து ஸ்விங் செய்யவில்லை என்றால், அவர் அங்கு போராட வேண்டி இருக்கும். அவர் ஒரு சிறந்த பந்து வீச்சாளர் என்பதில் சந்தேகமில்லை. இருபுறமும் ஸ்விங் செய்வார். யார்க்கரும் வீசுவார். ஆனால் ஆஸ்திரேலியாவில் உங்களுக்கு வேகம் தேவை. உம்ரான் மாலிக் நல்ல வேகத்தில் பந்துவீசுகிறார். அவரை அணியில் சேர்த்திருக்க வேண்டும்.

நான் இந்திய அணியின் தேர்வு குழுவில் இருந்திருந்தால் அவரை எப்போதும் அணியில் வைத்திருப்பேன், என்றார். மேலும் இந்த உலகக் கோப்பையில் இந்தியாவின் முக்கிய வீரராக யார் இருப்பார் என்ற கேள்விக்கு, ​​ஃபார்ம் பேட்டர் சூர்யகுமார்யாதவ் இந்தியாவின் துருப்புச் சீட்டாக இருப்பார்,என்றார். அவர் மிகவும் ஆபத்தான வீரர், 360 டிகிரி வீரர். அவர் கொல்கத்தா நைட் ரைடர்ஸ் அணியில் சேர்ந்தபோது பயிற்சியாளராக இருந்த நான் அவரை முதன்முதலில் பார்த்தேன். நான் அவருடன் 2 ஆண்டு பணியாற்றி உள்ளேன். ஆனால் கேகேஆர் அவரை விடுவித்தது எனக்கு ஆச்சரியமாக இருந்தது.

அவர் இளம்வீரராக இருந்தார், அப்போது அவருக்கு 19 அல்லது 20 வயது தான். அவர் இப்போது அணியில் இருந்திருந்தால் கேப்டனாக இருந்திருப்பார். இந்தியாவில் நல்ல பேட்டிங் வரிசை உள்ளது. ஆனால் பும்ராவின் மாற்று வீரரை இன்னும் குறிப்பிடவில்லை. பாகிஸ்தான் அணியில் மிடில் ஆர்டர் போராடி வருகிறது. மிடில்-ஆர்டர் கிளிக் செய்தால், பாகிஸ்தான் மிகச் சிறந்த பந்துவீச்சு தாக்குதல் மற்றும் சிறந்த தொடக்க ஜோடிகளில் ஒன்றாகும். எனவே மிடில் ஆர்டரை சரிசெய்தால் அவர்களுக்கு பட்டம் வெல்லும் வாய்ப்பு உள்ளது, என்றார்.