நடிகர் சூரிக்கு சொந்தமான உணவகங்களில் ரெய்டு

மதுரை: மதுரையில் நடிகர் சூரிக்கு சொந்தமான ‘‘அம்மன் உணவகங்கள்’’ காமராஜர் சாலை, அரசு மருத்துவமனை, ஊமச்சிகுளம், ரிசர்வ் லைன், ஒத்தக்கடை ஆகிய இடங்களில் உள்ளன. நேற்று இரவு வணிக வரித்துறை அதிகாரிகள் திடீரென்று இந்த உணவகங்களில் ஆய்வு மேற்கொண்டனர். இந்த ஓட்டல்களுக்கு உணவுப்பொருட்கள் கொள்முதல் செய்யப்பட்டுள்ளதில் முறைகேடுகள் நடந்துள்ளதாக புகார்கள் வந்துள்ளன.

கொள்முதல் செய்யப்பட்ட பொருட்களுக்கு முறையாக வணிகவரி செலுத்தப்படவில்லை என்றும் தகவல் கிடைத்துள்ளது. இதையடுத்து இந்த ஓட்டல்களின் தலைமை கிளையாக செயல்படும் மதுரை காமராஜர் சாலையில் உள்ள உணவகத்தில் நேற்று இரவு வணிகவரித் துறை அதிகாரிகள் சோதனை நடத்தி வருகின்றனர். மற்ற கிளைகளிலும் சோதனை நடத்தினர். இன்று காலையும் இந்த சோதனை நடந்தது. இதில் முக்கிய ஆவணங்கள் சிக்கியதாக தெரிகிறது.

இந்த ஆவணங்களை ஆய்வு செய்யும் பணியில் அதிகாரிகள் ஈடுபட்டுள்ளனர். மேலும் இது தொடர்பாக விளக்கம் அளிக்குமாறு ஓட்டல் பொறுப்பாளர்களுக்கு வணிகவரித் துறை அதிகாரிகள் உத்தரவு பிறப்பித்துள்ளனர்.