தேன்கனிக்கோட்டை அருகே சாலையோரம் உலா வந்த ஒற்றை யானை: விசில் அடித்து காட்டிற்குள் விரட்டினர்

தேன்கனிக்கோட்டை: தேன்கனிக்கோட்டை அருகே சாலையோரம் உலா வந்த ஒற்றை யானையை கிராம மக்கள் விசில் அடித்தும், சத்தம் போட்டும் காட்டிற்குள் விரட்டினர்.கிருஷ்ணகிரி மாவட்டம், தேன்கனிக்கோட்டை வனப்பகுதியில் 10க்கும் மேற்பட்ட யானைகள் மூன்று பிரிவுகளாக பிரிந்து, பயிர்களை நாசம் செய்து வருகின்றன. அதில் தனியாக சுற்றி வரும் ஒற்றை யானை, அவ்வப்போது கிராம பகுதிகளில் நுழைந்து பயிர்களை நாசம் செய்து விட்டு, மீண்டும் காட்டிற்குள் சென்றுவிடுகிறது. இந்நிலையில் நேற்று காலை, குந்தக்கோட்டை கிராமம் அருகேயுள்ள சாலையோரத்தில், ஒற்றை யானை சுற்றித்திரிந்தது. இதனை பார்த்த கிராம மக்கள் விசில் அடித்தும், சத்தம் போட்டும் யானையை அங்கிருந்து விரட்டும் முயற்சியில் ஈடுபட்டனர்.

இதையடுத்து அந்த யானை, குந்துக்கோட்டை- அஞ்செட்டி சாலையை கடந்து சென்றது. யானை சாலையோரம் உலா வந்ததால், அவ்வழியாக சென்ற வாகன ஓட்டிகள் அந்த பகுதியை கடக்காமல் அங்கு நின்று கொண்டிருந்தனர். இதுகுறித்து தகவல் அறிந்த தேன்கனிக்கோட்டை வனத்துறையினர், சம்பவ இடத்திற்கு விரைந்து வந்தனர். தொடர்ந்து சாலையை கடந்து, அப்பகுதியில் உள்ள காட்டிற்குள் சென்ற ஒற்றை யானையை, வனத்துறையினர் கண்காணித்து வருகின்றனர். ஒற்றை யானை சாலையை கடந்து சென்ற வீடியோ சமூக வலைதளங்களில் வைரலானது.

Related Stories: