நாமக்கல்: திரைப்பட காமெடி நடிகர் லிட்டில் ஜான் மாரடைப்பால் மரணமடைந்தார். உறங்கி கொண்டிருக்கும் போதே அவரின் உயிர் பிரிந்தது. நாமக்கல் மாவட்டம் குமாரபாளையம் அருகே உள்ள படைவீடு அல்லிநாயக்கன் பாளையத்தை சேர்ந்தவர் தனசேகரன் என்கிற லிட்டில் ஜான். தற்போது 43 வயதான இவர் 3 அடி உயரம் கொண்டவர். வெங்காயம், ஐம்புலன் ஆகிய திரைப்படங்களில் நகைச்சுவை காட்சிகளில் நடித்துள்ளார். கலை நிகழ்ச்சிகளிலும் பங்கேற்றுள்ளார். இந்நிலையில் திருச்செங்கோடு அருகே மாரியம்மன் கோயில் திருவிழாவை ஒட்டி நடைபெற்ற கலை நிகழ்ச்சியில் அவர் கலந்து கொண்டார்.

நிகழ்ச்சியை முடித்துவிட்டு இரவில் தனது அறைக்கு தூங்க சென்றார். மறுநாள் காலை வெகுநேரம் ஆகியும் அவர் எழுந்திருக்கவில்லை. இதனால் சந்தேகமடைந்த அவரது நண்பர்கள், அறைக்கு சென்று பார்த்தனர். அப்போது அவர் மாரடைப்பால் இறந்தது தெரியவந்தது. லிட்டில்ஜான் இறுதிசடங்கு அல்லிநாயக்கன்பாளையத்தில் நடந்தது. இதில் பல்வேறு கலை குழுக்களை சேர்ந்தவர்கள் மற்றும் பொதுமக்கள் கலந்து கொண்டு அவருக்கு அஞ்சலி செலுத்தினர்.