முதல்வர் மு.க.ஸ்டாலின் வீடு அமைந்துள்ள 122வது வார்டில் திமுக வேட்பாளர் வெற்றி: அதிமுகவை விட 4598 வாக்கு அதிகம்

சென்னை: சென்னை மாநகராட்சிக்குட்பட்ட 200 வார்டுகளுக்கு நேற்றுமுன்தினம் தேர்தல் முடிவுகள் வெளியானது. இதில், திமுக பெரும்பான்மையான இடங்களில் வெற்றி பெற்றுள்ளது.  மாநகராட்சி 122வது வார்டு ஆழ்வார்பேட்டையில் உள்ள முதல்வர் மு.க.ஸ்டாலின் வீடு பகுதியில் உள்ளது. எனவே, முதல்வர் வீடு அமைந்துள்ள வார்டு என்பதால் மற்ற வார்டுகளை காட்டிலும் இந்த வார்டில் திமுகவினர் வெற்றி பெற கூடுதல் கவனம் செலுத்தி வந்தனர். இந்த வார்டில் திமுக சார்பில் வா.ஷீபா என்பவரும், அதிமுக சார்பில்  துர்கா,  பாஜ சார்பில் யாமினி கிருஷ்ணன்,  தேமுதிக சார்பில் நூர்ஜஹான்  என்பவரும், மக்கள் நீதி மய்யம் சார்பில் பிரித்தி மோனிக்கா மை, நாம் தமிழர் கட்சி சார்பில் ஜெயா, அமமுக சார்பில்  முருகம்மாள், 4 சுயேச்சை வேட்பாளர்கள்  உட்பட 13 பேர் போட்டியிட்ட நிலையில் கடந்த 19ம் தேதி வாக்குப்பதிவு நடந்தது. இதில், 11,070 பேர் வாக்கு பதிவு செய்திருந்தனர்.

நேற்று முன்தினம் வாக்கு எண்ணிக்கை நடைபெறும் என்று அறிவிக்கப்பட்ட நிலையில், இந்த வார்டு முதல்வர் வீடு அமைந்துள்ளதால்  யார் வெற்றி பெறுவார்கள் என்பது அனைவரின் எதிர்பார்ப்பாக இருந்தது. நேற்று முன்தினம் முடிவுகள் வெளியானது. இதில், திமுக சார்பில் போட்டியிட்ட ஷீபா என்பவர் 7070 வாக்குகள் பெற்றுள்ளார். இந்த வார்டில் அதிமுக சார்பில் போட்டியிட்ட துர்கா 2472 வாக்குகளும், பாஜ வேட்பாளர் யாமினி 756 வாக்குகளும், மக்கள் நீதி மய்ய வேட்பாளர் பிரித்தி மோனிக்கா மை 623 வாக்குகளும் பெற்றனர். இதன் மூலம், 4598 வாக்குகள் வித்தியாசத்தில் ஷீபா அமோக வெற்றி பெற்றுள்ளார் என்பது குறிப்பிடத்தக்கது.