ஒரு காலத்தில் புகழின் உச்சியில் இருந்த சென்னை பல்கலை இப்போது பெயரை இழந்து வருகிறது: ஐகோர்ட் கருத்து

சென்னை: ஒரு காலத்தில் புகழ்பெற்ற பல்கலைக்கழகமாக விளங்கி வந்த சென்னை பல்கலைக்கழகம் இன்றைக்கு அந்த பெயரை இழந்து வருவதாக சென்னை உயர் நீதிமன்றம் வேதனை தெரிவித்துள்ளது. சென்னை பல்கலைக்கழகத்தில் கூடுதல் தொழில்நுட்ப அலுவலராக பணி புரிந்த பாஸ்கர் என்பவருக்கு, கூடுதல் நூலக உதவியாளராக பதவி உயர்வு வழங்கி தனி நீதிபதி உத்தரவிட்டார். இந்த உத்தரவை எதிர்த்து 2 பேர் தொடர்ந்த மேல் முறையீட்டு வழக்கு நீதிபதிகள் வைத்தியநாதன் மற்றும்  எஸ்.நக்கீரன் ஆகியோர் அடங்கிய அமர்வில் விசாரணைக்கு வந்தது. வழக்கை விசாரித்த நீதிபதிகள் பிறப்பித்த உத்தரவில், தனி நீதிபதி பிறப்பித்த உத்தரவால் மனுதாரர்களின் பதவி உயர்வில் பிரச்னை ஏற்பட்டுள்ளது. இதிலிருந்தே பல்கலைக்கழக அதிகாரிகள் முறைகேடுகளில் ஈடுபட்டுள்ளது தெரியவருகிறது.

ஒரு காலத்தில் புகழ்பெற்ற பல்கலைக்கழகமாக விளங்கி வந்த சென்னை பல்கலைக்கழகம் இன்றைக்கு அதன் பெயரை இழந்து வருகிறது. முந்தைய நாட்களில், சென்னை பல்கலைக்கழகத்தில் பட்டம் பெற்றதை பெருமையாக சொன்ன காலம் போய், இப்போது அதே பெருமை நீடிக்கிறதா என்பது மில்லியன் டாலர் கேள்வியாக உள்ளது. பல்கலைக்கழகத்தில் நேர்மை, அர்ப்பணிப்பு சேவையை பேணி பாதுகாக்காத அதிகாரிகளுக்கு எதிராக அதிகபட்ச தண்டனை விதிக்க வேண்டும். பொறுப்பற்ற அந்த அதிகாரிகளை பணி நீக்கம் செய்ய வேண்டும். பல்கலைக்கழகத்தின் நடவடிக்கையில் சந்தேகம் எழுந்துள்ளது. இந்த வழக்கில் பாஸ்கருக்கு பதவி உயர்வு வழங்கும்படி தனி நீதிபதி பிறப்பித்த உத்தரவு ரத்து செய்யப்படுகிறது என்று தெரிவித்துள்ளார்.

Related Stories: