×

கொரோனாவால் பாதிக்கப்பட்ட டான்ஸ் மாஸ்டரும் நடிகருமான சிவசங்கர் கவலைக்கிடம்: நடிகர் சோனு சூட் உதவி

சென்னை: தமிழ் உள்பட 10க்கும் மேற்பட்ட மொழிகளில் 800 படங்களுக்கு மேல் நடனக்காட்சி அமைத்தவர் சிவசங்கர் (73). ‘வரலாறு’, ‘ஒன்பது ரூபாய் நோட்டு’, ‘கண்ணா லட்டு தின்ன ஆசையா’, ‘பரதேசி’, ‘தில்லுமுல்லு’, ‘அரண்மனை’, ‘கஜினிகாந்த்’, ‘தானா சேர்ந்த கூட்டம்’ , ‘சர்கார்’ உள்பட பல படங்களில் குணச்சித்திர வேடங்களில் நடித்துள்ளார். ‘பூவே உனக்காக’, ‘விஷ்வ துளசி’, ‘வரலாறு’, ‘உளியின் ஓசை’ ஆகிய படங்களுக்காக தமிழக அரசின் சிறந்த நடன இயக்குனர் விருது பெற்றுள்ளார். தெலுங்கில் வெளியான ‘மகதீரா’ படத்தின் சிறந்த நடனத்துக்காக தேசிய விருது பெற்றுள்ளார்.

பாலு மகேந்திரா இயக்கிய ‘மறுபடியும்’ படத்தில் ரோகிணி நடனமாடிய ‘ஆச அதிகம் வெச்சு’, தனுஷ் நடித்த ‘திருடா திருடி’ படத்தில் இடம்பெற்ற ‘மன்மத ராசா’ போன்ற புகழ்பெற்ற பாடல்களுக்கு சிவசங்கர் நடனக்காட்சி அமைத்துள்ளார். கடந்த சில நாட்களுக்கு முன்பு கொரோனா தொற்றால் பாதிக்கப்பட்ட சிவசங்கர், அவரது மனைவி, மூத்த மகன் ஆகியோர் ஐதராபாத்தில் உள்ள மருத்துவமனையில் தீவிர சிகிச்சைக்காக அனுமதிக்கப்பட்டனர். மூவரில் சிவசங்கர் மிகவும் கவலைக்கிடமான நிலையில் சிகிச்சை பெற்று வருகிறார்.

அவரது சிகிச்சைக்கு அதிக செலவாகிறது என்றும், தனது குடும்பத்தினரால் அவ்வளவு பணத்தை செலுத்த முடியவில்லை என்றும், சிவசங்கரின் மருத்துவச் செலவுக்கு உதவும்படி அவரது மகன் அஜய் முரளி கிருஷ்ணா சமூக வலைத்தளத்தில் உதவி கேட்டுள்ளார். இந்நிலையில், சிவசங்கர் உடல்நிலை பற்றி அறிந்த நடிகர் சோனு சூட் அவருக்கு உதவி செய்துள்ளார். இதுகுறித்து அவர் தனது டிவிட்டரில், ‘நான் ஏற்கனவே அவரது குடும்பத்தினருடன் தொடர்பில் இருக்கிறேன். அவரது உயிரைக் காப்பாற்ற என்னால் முடிந்ததை செய்வேன்’ என்று பதிவிட்டுள்ளார்.

Tags : Sivashankar ,Sonu Sood , Dance master and actor Sivashankar worried about corona: Actor Sonu Sood assists
× RELATED அமைச்சர், எம்.பி. கூட்டணி கட்சி நிர்வாகிகளிடம் வாழ்த்து