பைனலில் நியூசிலாந்து

அபுதாபி: உலக கோப்பை டி20 தொடரின் முதல் அரை இறுதிப் போட்டியில் இங்கிலாந்து அணியை 5 விக்கெட் வித்தியாசத்தில் வென்று நியூசிலாந்து அணி பைனலுக்கு முன்னேறியது. அபுதாபியில் நேற்றிரவு நடந்த இப்போட்டியில் டாஸ் வென்ற நியூசிலாந்து அணி பந்துவீச்சை தேர்வு செய்தது. முதலில் பேட் செய்த இங்கிலாந்து அணி 20 ஓவரில் 4 விக்கெட் இழப்புக்கு 166 ரன் எடுத்தது. அதிகபட்சமாக மொயீன் அலி 37 பந்தில் ஆட்டமிழக்காமல் 51 ரன் (2 சிக்சர், 3 பவுண்டரி) விளாசினார். மாலன் 41 ரன் (30 பந்து), பட்லர் 29 ரன் (24 பந்து), லிவ்விங்ஸ்டன் 17 ரன் (10 பந்து), பயர்ஸ்டோ 13 ரன் (17 பந்து) எடுத்து ஆட்டமிழந்தனர். அடுத்து களமிறங்கிய நியூசிலாந்து அணி 19 ஓவரில் 5 விக்கெட் இழப்புக்கு 167 ரன் எடுத்து வெற்றி பெற்றது. துவக்க ஆட்டக்காரர் மிட்செல் ஆட்டமிழக்காமல் 72 ரன் (47 பந்து, 4 சிக்சர், 4 பவுண்டரி) குவித்து அணிக்கு வெற்றி தேடித் தந்தார். கான்வே 38 பந்தில் 46 ரன் விளாசினார். கப்தில் 4, வில்லியம்சன் 5, பிலிப்ஸ் 2, நீஷம் 27 ரன்னில் ஆட்டமிழந்தனர். இந்த வெற்றியின் மூலம் நியூசிலாந்து அணி இறுதிப் போட்டிக்கு முன்னேறி உள்ளது.