ரிஷப் பன்ட் தற்காப்பு ஆட்டம் ஆட வேண்டிய அவசியமில்லை: விராட் கோஹ்லி பேட்டி

லண்டன்: இந்தியா-இங்கிலாந்து அணிகள் இடையே 5 போட்டிகள் கொண்ட டெஸ்ட்தொடரில் நாட்டிங்காமில் நடந்த முதல் டெஸ்ட் டிராவில் முடிந்த நிலையில் 2வது டெஸ்ட் லண்டன் லார்ட்ஸ் மைதானத்தில் இன்று தொடங்குகிறது. வேகப்பந்து வீச்சாளர் ஷர்துல் தாகூர் காயம் காரணமாக இந்த டெஸ்ட்டில் ஆடவில்லை. அவருக்கு பதிலாக அஸ்வின் அல்லது இசாந்த் சர்மா சேர்க்கப்படலாம். இதுபற்றி இந்திய கேப்டன் விராட் கோஹ்லி கூறியதாவது: தாகூர் விளையாடும்போது ஆடும் லெவனில் சமநிலையை அளித்தார். அவருக்கு பதிலாக ஒரு சில ரன்களுக்காக ஒருவரை சேர்க்கமாட்டோம். எங்களுக்கு 20 விக்கெட்டை வீழ்த்துவது முக்கியம். தாகூர் போன்ற ஒருவர் கிடைக்கவில்லை என்றால், நாம் நிச்சயமாக 20 விக்கெட்டுகளை எடுப்பது எப்படி என்று யோசிக்கவேண்டும், மற்றொரு ஆளைச் செருக முயற்சிக்கக் கூடாது. முதல் டெஸ்ட் ஜடேஜா சிறப்பாக பேட்டிங் செய்தார். அது எங்கள் பேட்டிங்கை ஆழமாக்கியது. எனவே பேட்டிங் வரிசையில் நாங்கள் நன்றாக இருக்கிறோம்.

புஜாரா, ரகானே மறறும் நான் அதிக ரன்கள் எடுக்கவில்லை என்பது பற்றி கவலை இல்லை. கூட்டாக, அணிக்கு எவ்வளவு வலிமையைக் கொண்டு வருகிறார்கள் என்பது எங்கள் கவனம். ஒரு பேட்டிங் யூனிட்டாக, நாங்கள் கடினமான சூழ்நிலைகளில் செயல்பட விரும்புகிறோம், இதனால் நாங்கள் வெற்றிபெறும் நிலைகளில் இருக்கிறோம், ஒவ்வொரு ஆட்டத்திலும் யாராவது ஒருவர் சிறப்பாக பேட்டிங் செய்வர். கடைசி போட்டியில், கேஎல் ராகுல், ஜடேஜா, பும்ரா, ரிஷப் ஆகியோர் சிறப்பான ஆட்டத்தை வெளிப்படுத்தினர். ரோஹித் எங்களுக்கு ஒரு திடமான தொடக்கத்தைக் கொடுத்தார். முதல் டெஸ்டிற்கான டெம்ப்ளேட்டை தான் இரண்டாவது போட்டியிலும் பின்பற்ற விரும்புகிறோம். ரிஷப் பன்ட் அவரது பாணியில் ஆடுகிறார். அந்த வகையில் நீண்ட இன்னிங்ஸைத் தொடரவும் விளையாடவும் அவருக்குத் திறமை உள்ளது. இது மிகவும் தற்காப்பு பாத்திரமாக இருக்க வேண்டிய அவசியமில்லை.

ஒரு தேவை இருக்கும்போது, நாம் அணியை காப்பாற்றுகிறோமா என்பதை அவர் (பன்ட்) புரிந்து கொள்ளும் அளவுக்கு புத்திசாலி. ஆட்டத்தை மாற்றும் திறமை அவரிடம் உள்ளது, என்றார். இங்கிலாந்து அணியின் வேகப்பந்து வீச்சாளர் ஸ்டுவர்ட் பிராட், காயம் காரணமாக டெஸ்ட் தொடரில் இருந்து விலகி உள்ளார். ஆண்டர்சன் காயத்தால் அவதிப்பட்டாலும் நேற்று பந்துவீச்சு பயிற்சியில் ஈடுபட்டார். இருப்பினும் அவர் இன்று களம் இறங்குவாரா என்பது சந்தேகமாக உள்ளது. இதனிடையே ஆல்ரவுண்டர் மொயின் அலி ஆடும் லெவனில் இடம்பெறுகிறார். இங்கிலாந்து அணியின் பேட்ஸ்மேன் ஜானி பேர்ஸ்டோவ் கூறியதாவது: மூத்த பந்து வீச்சாளர்கள் ஸ்டுவர்ட் பிராட், ஆண்டர்சன் இல்லாமல் ஒரு டெஸ்ட்டுக்கு செல்லும் எண்ணம் நிச்சயமாக நல்லதல்ல. இருவரும் இணைந்து ஆயிரம் விக்கெட்டிற்கு மேல் எடுத்துள்ளனர். ஆண்டர்சன் காயம் குறித்து எனக்கு அவ்வளவு தெரியாது. இருவரும் இல்லை என்றால் எங்களின் பந்துவீச்சு தாக்குதல் சற்று குறைந்துவிடும், என்றார்.