கபாலீஸ்வரர் கோயிலுக்கு சொந்தமான மயிலாப்பூர் கிளப்பில் 10 ஆண்டாக செயல்பட்டு வந்த மதுபான பாருக்கு சீல்

* அமைச்சர் உத்தரவை தொடர்ந்து அதிரடி நடவடிக்கை
*ரூ.3 கோடி வாடகை பாக்கியை முழுவதும் தரக்கோரி நோட்டீஸ்

சென்னை: கபாலீஸ்வரர் கோயிலுக்கு சொந்தமான இடத்தில் செயல்பட்டு வரும் மயிலாப்பூர் கிளப்பில், கடந்த 10 ஆண்டுகளாக நடத்தப்பட்டு வந்த மதுபான பாருக்கு கோயில் நிர்வாகம் அதிரடியாக சீல் வைத்தது. மேலும்ரூ.3 கோடி வாடகை பாக்கியை செலுத்த வேண்டும் என்று கோயில் நிர்வாகம் நோட்டீஸ் அனுப்பியுள்ளது.மயிலாப்பூர் கபாலீஸ்வரர் கோயிலுக்கு சொந்தமான 42 கிரவுண்ட் இடம், மயிலாப்பூர் லஸ் கார்னரில் ‘தி  மயிலாப்பூர் கிளப்’ நடத்த 1903 ஜனவரி 1ம் தேதி அளிக்கப்பட்டது.  இந்நிலையில் இதன் குத்தகை காலம் கடந்த 2000ம் ஆண்டு முடிவடைந்தது. அதன்பிறகு, குத்தகைக்கு விட தடை விதிக்கப்பட்டது. எனவே, மயிலாப்பூர் கிளப் நிர்வாகத்திடம் கோயில் நிர்வாகம் சந்தை நிலவரம் அடிப்படையில் நிர்ணயித்து வாடகை வசூலித்து வந்தது.

இந்த நிலையில், 2007ல் இந்த 42 கிரவுண்ட் நிலத்தில் 18 கிரவுண்ட் நிலத்தை கோயில் நிர்வாகம் கையகப்படுத்தி, அதை பொதுமக்களுக்கு பயன்படும் வகையில் அங்கு பார்க்கிங் மற்றும் நூலக கட்டப்பட்டது.  இதனால் மீதம் இருந்த 24 கிரவுண்ட் நிலத்துக்கு கடந்த 2007 முதல் மாத வாடகைரூ.2.50 லட்சம் என நிர்ணயித்து ‘தி மயிலாப்பூர் கிளப்’ அறக்கட்டளை நிர்வாகத்துக்கு விடப்பட்டது. ஒவ்வொரு 3 ஆண்டுகளுக்கு ஒரு முறையும்ரூ.50 ஆயிரம் கட்டணம் உயர்த்துவது என்று முடிவு செய்யப்பட்டது. இந்நிலையில், கடந்த 2016ல் சந்தை மதிப்பின் அடிப்படையில் வாடகை நிர்ணயம் செய்யப்பட்டதால் மாதம்ரூ.4.50 லட்சம் செலுத்த வேண்டும் என்று கோயில் நிர்வாகம் சார்பில் நோட்டீஸ் அனுப்பப்பட்டது.

அதன்பேரில் தான்ரூ.3.57 கோடி பாக்கி வைத்திருப்பதாக கூறப்படுகிறது. அந்த பாக்கி தொகையை செலுத்த கோரி கோயில் நிர்வாகம் பலமுறை கிளப் நிர்வாகத்துக்கு நோட்டீஸ் அனுப்பியது. அதன்பேரில்  சில லட்சங்களை மட்டும் கிளப் நிர்வாகம் செலுத்தியதாக கூறப்படுகிறது. ஆனால் இன்னும்ரூ.3 கோடி பாக்கி தொகை தர வேண்டியிருப்பதாக தெரிகிறது.  இந்நிலையில் கோயிலின் புனித தன்மைக்கு பங்கம் விளைவிக்கும் வகையில், மயிலாப்பூர் கிளப் நிர்வாகத்துக்கு பார் நடத்த சென்னை மாவட்ட கலெக்டரிடம் லைசென்ஸ் வாங்கி நடத்தி வந்ததாக தெரிகிறது. பார் நடத்த அனுமதி அளித்தது தொடர்பாக கோயில் நிர்வாகம் சார்பில் கிளப் நிர்வாகம் மற்றும் சென்னை மாவட்ட கலெக்டர் அலுவலகத்திடம் விளக்கம் கேட்டு கடிதம் எழுதியிருந்தது.

ஆனாலும், அரசியல் அழுத்தம் காரணமாக கலெக்டர் அலுவலகம் தொடர்ந்து கிளப் நிர்வாகம் பார் நடத்த லைசென்ஸ் அளித்ததாக தெரிகிறது. இதனால், கோயில் நிர்வாகத்தால் எதுவும் செய்ய முடியாத நிலை ஏற்பட்டது.  இந்நிலையில், திமுக ஆட்சி பொறுப்பேற்ற நிலையில் அமைச்சர் சேகர்பாபுவிடம் கோயில் நிர்வாகம் சார்பில் இது தொடர்பாக தகவல் அளிக்கப்பட்டுள்ளது. இதை தொடர்ந்து அமைச்சர் சேகர்பாபு, மயிலாப்பூர் கிளப்பில் இருந்து மதுபான பாரை எடுக்கவில்லை என்றால் கோயில் நிர்வாகம் சார்பில் சீல் வைக்குமாறு உத்தரவிட்டார்.  இதை தொடர்ந்து, மயிலாப்பூர் கபாலீஸ்வரர் கோயில் நிர்வாகம் சார்பில், மயிலாப்பூர் கிளப் நிர்வாக தலைவர் பிரமிட் நடராஜனுக்கு கடந்த 9ம் தேதி  நோட்டீஸ் அனுப்பியது. இதையடுத்து, பிரமிட் நடராஜன் அந்த கிளப்பின் உறுப்பினர்களுக்கு ஒரு கடிதம் ஒன்றை எழுதி அனுப்பியுள்ளார்.

அதில், மயிலாப்பூர் கபாலீஸ்வரர் கோயிலுக்கு சொந்தமான இடத்தில் உள்ள தி மயிலாப்பூர் கிளப்பில் பார் செயல்படுவது அறநிலையத்துறை விதிகள், ஒழுங்குமுறை சட்டத்துக்கு எதிரானது. அதை மூடவில்லை என்றால், கிளப்பை ஆக்கிரமிப்பாளராக கருதி அகற்றப்படும் என்று கோயில் நிர்வாகம் தெரிவித்துள்ளது.  எனவே, தற்போதைய சூழ்நிலையை கருத்தில் கொண்டு பாரை மூடுவது என்று முடிவு செய்யப்பட்டுள்ளது. 120 ஆண்டுகள் பழமையான இந்த கிளப் பாதுகாக்கப்பட வேண்டும். சோஷியல் கிளப்பில் பார் என்பது மிகவும் அத்தியாவசியமான ஒன்று தான். இதற்கான மாற்று ஏற்பாடுகளை கிளப் நிர்வாகம் செய்ய முடிவு செய்யப்பட்டுள்ளது என்று அதில் கூறப்பட்டுள்ளது.

இதற்கிடையே கோயில் நிர்வாகம் சார்பில் கிளப்பில் செயல்பட்டு வந்த பார் அதிரடியாக சீல் வைத்துள்ளது. இந்த நிலையில் மாவட்ட கலெக்டர் அலுவலகத்தில் பாருக்கான லைசென்ஸ் ஓராண்டு உள்ள நிலையில் இதுகுறித்து மயிலாப்பூர் கோயில் நிர்வாகம் சார்பில் கலெக்டர் அலுவலகத்துக்கு உரிமத்தை ரத்து செய்ய வேண்டும் என்று கடிதம் எழுதியிருப்பாக கோயில் நிர்வாகம் தெரிவித்துள்ளது. அதுமட்டுமின்றி, மயிலாப்பூர் கிளப் நிர்வாகத்திடம் வாடகை பாக்கியானரூ.3 கோடியை முழுவதுமாக செலுத்த கோரி கோயில் நிர்வாகம் நோட்டீஸ் அளித்து இருப்பதாகவும் தெரிகிறது. இந்த பாக்கி தொகையை செலுத்தாவிட்டால் கடும் நடவடிக்கை எடுக்கப்படும் என்று கோயில் நிர்வாகம் எச்சரிக்கை விடுத்துள்ளதாகவும் கூறப்படுகிறது.

விவிஐபிக்கள் பெயரில் ஆட்டம்
மயிலாப்பூர் லஸ் கார்னரில் ‘தி மயிலாப்பூர் கிளப்’ கடந்த 1903 ஜனவரி 1ம் தேதி தொடங்கப்பட்டது. கபாலீஸ்வரர்  கோயிலுக்கு சொந்தமான 42 கிரவுண்ட் நிலத்தில் இந்த கிளப் உள்ளது. இங்கு அரசியல், சினிமாவை சேர்ந்த முக்கிய பிரமுகர்கள், தொழிலதிபர்கள்  உறுப்பினர்களாக உள்ளனர். உடற்பயிற்சி கூடத்துடன் உள்ள இந்த கிளப் மூலம்  ஆரம்பத்தில் கிரிக்கெட், டென்னிஸ் விளையாட்டுக்கு பயிற்சி தரப்பட்டது.  மேலும், இசை கச்சேரி மற்றும் சுப நிகழ்ச்சிகளுக்கு இந்த கிளப் வாடகைக்கும்  விடப்படுகிறது. அதன் பிறகு சீட்டு, மதுபானம் என்ற பெயரில் சென்னையின் விவிஐபிக்கள் தங்கள் செல்வாக்கை பயன்படுத்தி கோயில் இடத்தின் புனித தன்மைக்கு கேடு விளைவித்தனர். ஆரம்பத்தில் இந்த கிளப் குத்தகைக்கு விடப்பட்டிருந்தது. கடந்த 2000ம் ஆண்டு அந்த குத்தகை காலம் முடிவடைந்தது.

விதியை மீறி  பாருக்கு லைசென்ஸ்
சமூக செயல்பாடுகளில் ஈடுபட்ட கிளப்  நிர்வாகம், ஒரு கட்டத்தில் சீட்டாட்டம் நடத்த ஆரம்பித்தது. பார் போன்ற  வசதிகளும் ஏற்பாடு செய்யப்பட்டது. கோயில் இடத்தில் மதுபானம் நடத்துவதற்கும், குடிப்பதற்கும் அனுமதிக்கக் கூடாது என்று கோயில் நிர்வாகம் சார்பில் ஆட்சேபனை தெரிவிக்கப்பட்டது. ஆனாலும், இந்த மைலாப்பூர் கிளப்பில்  விஐபிக்கள் உறுப்பினர்களாக இருந்ததால், கடந்த 10 ஆண்டுகளாக கிளப்  நிர்வாகம் சார்பில் மதுபான பார் நடத்தப்பட்டது. இதற்கு கலெக்டர் விதிமீறி அனுமதி அளித்திருந்தார்.

கோயில் நிலத்தை முழுமையாக கைப்பற்ற வேண்டும்
புனிதமான கபாலீஸ்வரர் கோயிலுக்குச்  சொந்தமான இடத்தில் பார் நடத்தவும், மதுபானம் அருந்தவும் அனுமதி அளிக்கப்பட்டுள்ளது, கோயிலின் புனிதத்தை கெடுத்துள்ளது. இதனால் உடனடியாக அந்த கிளப்பை அறநிலையத்துறை கைப்பற்ற வேண்டும் என்றும். பல நூறு கோடி  மதிப்புள்ள இடத்தில் கோயிலுக்கு வருமானம் வரும் வகையில் நடவடிக்கை எடுக்க வேண்டும் என்றும் பக்தர்கள் வேண்டுகோள் விடுத்துள்ளனர்.