தேர்தல் பாதுகாப்புக்கு வந்த இடத்தில் கொரோனா குஜராத் போலீஸ்காரர் சேலத்தில் பலி: அதிர்ச்சியில் தந்தை, சகோதரியும் சாவு

சேலம்: சேலத்தில். தேர்தல் பணியாற்றிய குஜராத் போலீஸ்காரர் கொரோனாவுக்கு உயிரிழந்தார். இந்த தகவல் கேட்டதும் அவரது தந்தை, சகோதரி ஆகியோரும் உயிரிழந்த சம்பவம் பரபரப்பை ஏற்படுத்தியுள்ளது. தமிழக சட்டமன்ற தேர்தல் பாதுகாப்பிற்காக குஜராத் மாநிலத்தை சேர்ந்த ஆயுதப்படை போலீசார் 90 பேர் சேலம் வந்துள்ளனர். இவர்கள், வீரகனூர் முகாமில் தங்கியிருந்து பணியாற்றினர். அவர்களில் ஒருவரான போலீஸ்காரர் ஜிஜேந்திர சூரியவன்சி (49) என்பவருக்கும் திடீரென உடல்நலக்குறைவு ஏற்பட்டது. இதையடுத்து அவர் மருத்துவமனைக்கு அழைத்துச் செல்லப்பட்டார். அங்கு கொரோனா பரிசோதனை மேற்கொண்டனர். அதில் கொரோனா இருப்பது தெரியவந்தது.

இதையடுத்து கடந்த 7ம் தேதி சேலம் அரசு மருத்துவமனையில் அனுமதிக்கப்பட்டார். பின்னர் மேல் சிகிச்சைக்காக 5 ரோட்டில் உள்ள தனியார் மருத்துவமனையில் அனுமதிக்கப்பட்டார். அவருடன் இருந்த மற்ற அனைவருக்கும் கொரோனா பரிசோதனை மேற்கொள்ளப்பட்டது. அதில், அனைவருக்கும் நெகட்டிவ் என ரிசல்ட் வந்தது. இந்நிலையில், மருத்துவமனையில் சிகிச்சை பெற்று வந்த ஜிஜேந்திர சூரியவன்சி நேற்றுமுன்தினம் சிகிச்சை பலனின்றி உயிரிழந்தார். அவருக்கு கல்லீரல் பாதிப்பு இருந்ததாகவும் கூறப்படுகிறது. இதுகுறித்து குஜராத்தில் உள்ள அவரது குடும்பத்தினருக்கு தகவல் தெரிவிக்கப்பட்டது. அதனை கேட்டவுடன் ஜிஜேந்திர சூரியவன்சியின் தந்தை தவுலத்பாய் மற்றும் சகோதரி மங்கள்பான் ஆகியோர் திடீரென மயங்கி விழுந்தனர்.

இதையடுத்து இரண்டு பேரையும் மீட்ட குடும்பத்தினர் மருத்துவமனைக்கு கொண்டு சென்றனர். அங்கு அவர்களுக்கு கொரோனா இருப்பது உறுதி செய்யப்பட்டது. இதையடுத்து சிகிச்சை அளிக்கப்பட்ட சிறிது நேரத்தில் இருவரும் அடுத்தடுத்து உயிரிழந்தனர். இதனால் பரபரப்பு ஏற்பட்டது.  இந்நிலையில் ஜிஜேந்திர சூரியவன்சி உடலை சேலத்திலிருந்து குஜராத்திற்கு கொண்டு செல்ல நடவடிக்கை எடுக்கப்பட்டது. இருந்தபோதிலும் கொரோனா தொற்று ஏற்பட்டிருந்ததால் சேலத்திலேயே தகனம் செய்வது தொடர்பாக அவரது உறவினர்களிடம் பேச்சுவார்த்தை நடத்தினர். அதற்கு அவர்கள் சம்மதம் தெரிவித்த பிறகு நேற்று காலை, சேலத்தில் அரசு மரியாதையுடன் துப்பாக்கி குண்டுகள் முழங்க ஜிஜேந்திர சூரியவன்சியின் உடல் தகனம் செய்யப்பட்டது.

Related Stories:

>