ஓசூர், மார்ச் 13: ஓசூர் வனக்கோட்டத்தில் நடந்த 2ம் கட்ட பறவைகள் கணக்கெடுப்பின் போது, 218 பறவை இனங்கள் கண்டுபிடிக்கப்பட்டுள்ளது. கிருஷ்ணகிரி மாவட்டம், ஓசூர் வனக்கோட்டத்தின் மொத்த பரப்பளவு 1501 சதுர கி.மீ ஆகும். இதில் காவேரி வடக்கு வன உயிரின சரணாலயத்தின் பரப்பளவு 504.33 ச.கி.மீ மற்றும் காவேரி தெற்கு வன உயிரின சரணாலயத்தின் பரப்பளவு 686.40 ச.கி.மீ அடங்கும். இங்கு 468 வகையான தாவர இனங்களும், 36 வகையான பாலூட்டிகளும், 272 வகையான பறவை இனங்களும், 172 வகையான வண்ணத்து பூச்சிகளும் காணப்படுகிறது. அதிக எண்ணிக்கையில் யானைகள், காட்டெருமைகள், மான்கள், கரடிகள், எறும்பு திண்ணிகள், சிறுத்தைகள் மற்றும் மயில்கள் போன்ற வன உயிரினங்களும், அரியவகை விலங்குகளான சாம்பல்நிற அணில்கள், எகிப்திய கழுகுகள் போன்றவையும் காணப்படுகின்றன. ஓசூர் வனக்கோட்டமானது காவேரி, சின்னாறு, தென்பெண்ணையார் மற்றும் தொட்டஹல்லா ஆறுகளின் நீர்ப்பிடிப்பு பகுதிகளாக அமைந்துள்ளது. ஓசூர் வனக்கோட்டத்தில் காவேரி வடக்கு மற்றும் காவேரி தெற்கு வன உயிரின சரணாலயங்களில், பல்வேறு வகையான பறவை இனங்கள் மற்றும் இதர வன உயிரினங்கள் வசித்து வருகின்றன. நடப்பாண்டில் தமிழ்நாடு முழுவதும் வனத்துறையின் மூலம், 2 கட்டங்களாக பறவைகள் கணக்கெடுப்பு நடத்த திட்டமிடப்பட்டு, முதற்கட்டமாக காப்புக்காடுகளுக்கு வெளியில் உள்ள ஈர நிலப் பகுதிகளிலும், 2ம் கட்டமாக காப்புக்காடு பகுதிகளிலும் நடத்த திட்டமிடப்பட்டது. அதன்படி, கிருஷ்ணகிரி மாவட்டத்தில் கடந்த ஜனவரி மாதம் 29ம் தேதி, காப்புக்காடுகளுக்கு வெளியில் உள்ள ஈர நிலங்களான ராமநாயக்கன் ஏரி, பாரூர் ஏரி, கே.ஆர்.பி.டேம், கெலவரப்பள்ளி டேம், தளி ஏரி உள்ளிட்ட 15 நீர்நிலைகளில் நடைபெற்ற பறவைகள் கணக்கெடுப்பில் சுமார் 40க்கும் அதிகமான வன அலுவலர்கள், வனப்பணியாளர்கள் மற்றும் 50 தன்னார்வலர்கள் கலந்துகொண்டு, சுமார் 175க்கும் அதிகமான பறவை இனங்கள் அடையாளம் கண்டு பதிவு செய்யப்பட்டது. இதை போலவே, பல்வேறு துறைகளில் பணியாற்றும் தன்னார்வலர்கள், கல்லூரி மாணவர்கள் ஆகியோரை ஒருங்கிணைத்து, கடந்த 4 மற்றும் 5ம் தேதிகளில் ஓசூர் கென்னத் ஆண்டர்சன் நேச்சர் சொசைட்டி தன்னார்வ தொண்டு நிறுவனத்தினர் உதவியுடன், ஓசூர் வனக்கோட்டம், காவேரி வடக்கு வன உயிரின சரணயாலயம் மற்றும் காவேரி தெற்கு வனஉயிரின சரணாலய பகுதிகளிலும், காவேரி, சின்னாறு நீர்ப்பிடிப்பு பகுதிகள் உள்ள உரிகம் மற்றும் அஞ்செட்டி வனச்சரகங்களில் 24 பீட்களில் உள்ள காப்புக்காடுகளிலும் பறவைகள் கணக்கெடுப்பு நடத்தப்பட்டது. இதில் சுமார் 60க்கும் மேற்பட்ட தன்னாவர்லர்கள் பங்கேற்றனர். மேலும், கிருஷ்ணகிரி மற்றும் தர்மபுரி மாவட்டங்களில், பாலூட்டிகள் கணக்கெடுப்பும் அப்போதே நடத்தப்பட்டது. இதில் சுமார் 150க்கும் அதிகமான தன்னார்வலர்கள் கலந்துகொண்டனர். இந்த கணக்கெடுப்பிற்காக கடந்த 2ம் தேதி, ஓசூர் வனக்கோட்ட வன உயிரின காப்பாளர் கார்த்திகேயனி தலைமையில், வனப்பணியாளர்கள் மற்றும் தன்னார்வலர்களுக்கு பயிற்சி மற்றும் கணக்கெடுப்பின் போது மேற்கொள்ள வேண்டிய பாதுகாப்பு நடவடிக்கைகள் குறித்தான பயிற்சி ஆன்லைன் மூலம் அளிக்கப்பட்டது. இந்த 2ம் கட்ட கணக்கெடுப்பின் போது, கருந்தலை மாம்பழக் குருவி, நீலத்தொண்டை ஈப்பிடிப்பான், பருந்து, செந்தலை பஞ்சுருட்டான், மீன் கொத்தி, கள்ளிப்புறா, கொண்டலாத்தி குருவி, பெரிய பச்சைப்புறா, காட்டுப்பக்கி குருவி, அரசவால் ஈப்பிடிப்பான், ஷஜர்டன் பச்சைச் சிட்டு, சிறிய மீன்பிடி கழுகு, பச்சைக்கிளி, ஓணான் கொத்தி கழுகு, சிறிய மின் சிட்டு, தடித்த அலகு மீன்கொத்தி, வரி வாலாட்டி குருவி, பச்சை குக்குருவான், பச்சை பஞ்சுருட்டான், ஊதா தேன்சிட்டு, பச்சைச் சிட்டு, கதிர் குருவி உள்ளிட்ட 218 பறவை இனங்கள் கண்டுபிடிக்கப்பட்டுள்ளது என ஓசூர் வனக்கோட்ட வன உயிரின காப்பாளர் கார்த்திகேயனி தெரிவித்தார். …
The post 218 பறவை இனங்கள் கண்டுபிடிப்பு appeared first on Dinakaran. | 218 பறவை இனங்கள் கண்டுபிடிப்பு | Dinakaran
×
218 பறவை இனங்கள் கண்டுபிடிப்பு
05:26 am Mar 13, 2023 |
Tags : Hosur ,Hosur Forest Reserve ,Krishnagiri District ,Cauvery North Wildlife Sanctuary ,Cauvery South Wildlife Sanctuary ,Kaveri ,Chinnar ,Tenpennaiyar ,Thottahalla rivers ,Kaveri North ,Kaveri South Wildlife Sanctuaries ,Ramanayakan Lake ,Parur Lake ,KRP Dam ,Kelavarapalli Dam ,Thali Lake ,Hosur Vanakottam ,Cauvery ,North Wildlife Sanctuary ,South Wildlife Sanctuary ,Urikam ,Chinnaru ,Anchetty Forests ,Krishnagiri ,Dharmapuri ,Hosur Vanakotta Wildlife ,Conservator ,Karthikeyani ,Lesser Fisher ,Hosur Vanakotta ,Wildlife ,Dinakaran ,