டிரம்ப் உட்பட யாராக இருந்தாலும் தவறான பதிவு முடக்கப்படும் பேஸ்புக் அதிரடி அறிவிப்பு

ஆக்லேண்ட்: ‘அமெரிக்க அதிபர் டிரம்ப் உள்ளிட்ட அரசியல்வாதிகளின் மக்களை திசை திருப்பும் தவறான பதிவுகள் முடக்கப்படும்,’ என பேஸ்புக் அறிவித்துள்ளது.  டிவிட்டருக்கும் அமெரிக்க அதிபர் டிரம்ப்புக்கும் ஏற்கனவே மோதல் போக்கு நிலவுகிறது. அவருடைய சமீபத்தில் பல பதிவுகளை டிவிட்டர் நீக்கியது. ஆனால், பேஸ்புக் அதை செய்ய மறுத்தது. இந்நிலையில், அமெரிக்க அதிபர் டிரம்ப் உட்பட எந்த அரசியல்வாதியாக இருந்தாலும், அவர்கள் பதிவிடும் திசை திருப்பும் செய்திகள் தவறானவை என குறியீடு செய்யப்படும் என்றும், மிகவும் தகுதியற்றவை முடக்கப்படும் என்றும் பேஸ்புக் நிர்வாகம் நேற்று திடீரென அறிவித்தது.

இது தொடர்பாக இதன் தலைமை நிர்வாக அதிகாரி ஜூகர் பெர்க் பேஸ்புக்கில்  வெளியிட்டுள்ள பதிவில், ‘இந்த புதிய விதிமுறைகள் இன்று முதல் நடைமுறைக்கு வருகின்றன. இந்த விதிமுறைகளை மீறும் வகையில் பதிவுகளை வெளியிட்டால்,  அதிபர் டிரம்ப் உட்பட யாராக இருந்தாலும் அது முடக்கப்படும் அல்லது தவறானவை  என குறியீடு செய்யப்படும். அமெரிக்க தேர்தலில் மக்கள் வாக்களிப்பதை ஊக்கப்படுத்தும் நோக்கத்தில் வெளியாகும் , தவறான தகவல்கள் தடை செய்யப்படும். தேர்தல் நடப்பதற்கு 72 மணி நேரத்திற்கு முன்பாக, உள்ளூர் வாக்குப்பதிவு நிலவரங்கள் குறித்த தவறான தகவல்கள் அகற்றப்படும்,’ என குறிப்பிட்டுள்ளார்.