ஆந்திராவில் கோயில்கள் விரைவில் திறக்கப்படும் என்று மாநில அரசு அறிவிப்பு: ஒரு மணி நேரத்திற்கு 250 பேர் மட்டுமே அனுமதி

அமராவதி: ஆந்திர மாநிலத்தில் உள்ள கோயில்கள் விரைவில் திறக்கப்படும் என்று ஆந்திர மாநில அரசு அறிவித்து அரசாணை வெளியிட்டுள்ளது. ஆந்திராவில்  காலை 6 மணி முதல் மாலை 6 மணி வரை நிபந்தனைகளுடன் கோயில்களை திறக்க மாநில அரசு அனுமதி அளிக்கப்படுகிறது. நெறிமுறைகள் பின்வருமாறு

* கோயிலுக்கு வரும் பக்தர்கள் கண்டிப்பாக முகக்கவசம் அணிய வேண்டும் எ.

* கோயில்களில் ஒரு மணி நேரத்திற்கு 250 பக்தர்கள் மட்டுமே அனுமதிக்கப்படுவர்.

* கோயில்களில் திருநீறு மற்றும் தீர்த்தம் வழங்க அனுமதி மறுக்கப்பட்டுள்ளது.

* தரிசனத்தின் போது 6 அடி சமூக இடைவெளியில் பக்தர்கள் இருக்க வேண்டும்.

* மாநிலத்தில் உள்ள அனைத்து கோயில்களிலும் கொரோனா முன்னெச்சரிக்கை நடவடிக்கை எடுக்கப்பட்டுள்ளதா? என்பது குறித்து அறிக்கை சமர்ப்பிக்க அரசு உயர் அதிகாரிகளுக்கு உத்தரவு .

* மக்கள் கூட்டம் அதிகளவில் கூட வாய்ப்பிருக்கும் கோயில்களில் தரிசனத்துக்கு அனுமதி மறுக்கப்பட்டுள்ளது.

*  கோயில்களின் அனைத்து வாயில்களிலும் சோப் மற்றும் கைகழுவ வசதியாக குழாய் நீருக்கு ஏற்பாடு செய்ய வேண்டும்.

* கைகழுவ வசதியாக இருக்கும் குழாய்களின் இருமுனைகள் சமூக இடைவெளியை பின்பற்றும் வகையில் இருக்க வேண்டும்.

* கோயில்களுக்கு வருபவர்கள் சமூக இடைவெளியுடன் வரிசையில் நின்று கிருமிநாசினி( sodium hypochlorite) தெளித்துக்கொள்ள வேண்டும்.

* மேலும் கோயில்களுக்கு வருபவர்கள் அனைவருக்கும் கொரோனா அறிகுறி பரிசோதனை செய்யப்படும், அறிகுறி இல்லாதவர்கள் மட்டுமே கோயிலின் உள்ளே அனுமதிக்கப்படுவார்கள்.

*  கோயில்களுக்கு தரிசனம் செய்ய வருபவர்கள் கொடுக்கப்பட்ட தொலைபேசி எண்களின் மெசேஜ் மூலம், தரிசனம் நேர டோக்கன்  பெற அனுப்புமாறு பொதுமக்களுக்கு அறிவுறுத்தப்பட்டுள்ளது. கோயில் தரிசனத்துக்கு வரும் பொழுது ஆதார் அடையாள அட்டையை கொண்டு கோயில் தரிசனம் நேர டோக்கன்  பெற வலியுறுத்தப்பட்டுள்ளது.