டெல்லி :நாடு முழுவதும் கொரோனா சிகிச்சைக்காக 2,500 ரயில் பெட்டிகளில் 40 ஆயிரம் படுக்கைகள் தயார் நிலையில் உள்ளதாக ரயில்வே அறிவித்துள்ளது. கொரோனா தொற்றுக்கு பாதிக்கப்பட்டோர் எண்ணிக்கை அதிகரித்து வரும் நிலையில், ரயில் பெட்டிகளை படுக்கைகளாக மாற்ற மத்திய அரசு அனுமதி அளித்துள்ளது.
உலக நாடுகளை அச்சுறுத்தும் கொரோனா வைரஸ் இந்தியாவிலும் பரவி வருகிறது. இந்தியாவில் கொரோனா வைரசால் பாதிக்கப்பட்டவர்கள் எண்ணிக்கை 4,067ஆக அதிகரித்துள்ளது என்று மத்திய சுகாதாரத்துறை அமைச்சகம் தெரிவித்துள்ளது. இதனால் ஏப்ரல் 14ம் தேதி வரை ஊரடங்கு உத்தரவை மத்திய அரசு பிறப்பித்துள்ளதுஅத்தியாவசிய தேவைகள் தவிர மற்ற எதற்கும் வெளியே வரவேண்டாம் என கூறப்பட்டுள்ளது.
இந்திய ரயில்வே வருகிற ஏப்ரல் 14ம் தேதி வரை கொரோனா பரவலை தடுப்பதற்காக அனைத்து பயணிகள் ரயிலையும் ரத்து செய்துள்ளது. இந்த நிலையில் கொரோனா வைரஸ் தொற்றால் பாதிக்கப்பட்டவர்களுக்கு சிகிச்சை அளிப்பதற்காக ரயில்வே பெட்டிகளை தனிமை வார்டுகளாக மாற்றித் தர இந்திய ரயில்வே முன்வந்துள்ளது. அதற்கு மத்திய அரசும் அனுமதி அளித்தது.அதன்படி பல்வேறு மாநிலங்களில் ஏசி அல்லாத படுக்கை வசதி கொண்ட பெட்டிகளில் மாற்றங்களை கொண்டு வர ரயில்வே துறை முடிவு செய்துள்ளது. ரயிலில் உள்ள கழிவறையை குளியலறையாக மாற்றி உள்ளனர். கை கழுவுவதற்கான வசதி ஏற்படுத்தப்பட்டு அங்கு வாளி, குவளை, சோப் உள்ளிட்டவை வைக்கப்பட்டுள்ளது.மருத்துவ சாதனங்களை வைப்பதற்கான இடம் ஒவ்வொரு கேபினிலும் உருவாக்கப்படும் என்றும், மொபைல், லேப்டாப் சார்ஜ் செய்யும் வசதி செய்யப்பட்டுள்ளது. 230 வோல்ட் பிளக் பாயின்ட் ஒவ்வொரு கேபினிலும் பொருத்தவும், நோயாளிகளை தனிமைப்படுத்த இரண்டு படுக்கைகளுக்கு நடுவே பிளாஸ்டிக் திரைச்சீலை அமைக்கவும் ரயில்வேதுறை முடிவு செய்துள்ளது.
இந்தியாவில் கொரோனா சிகிச்சைக்காக 2,500 ரயில் பெட்டிகளில் 40 ஆயிரம் படுக்கைகள் தயார் :ரயில்வே அமைச்சகம் அறிவிப்பு!
05:36 pm Apr 06, 2020 |
