சென்னை: தமிழ் திரைப்பட வினியோகஸ்தர்கள் சங்க கூட்டம் சென்னையில் நேற்று நடந்தது. இதில் நிறைவேற்றப்பட்ட தீர்மானங்கள்: வினியோகஸ்தர்கள் படங்களை வினியோகித்து அதன் மூலம் வரும் வருவாய்க்கு விதிக்கப்படும் 10% டிடிஎஸ் வரியை முற்றிலுமாக ரத்து செய்ய வேண்டும். இதற்கு மத்திய அரசு ஒத்துழைக்க வேண்டும்.
மேலும் இந்த கோரிக்கையை வலியுறுத்தும் விதமாக, வரும் 27ம் தேதி முதல் எந்த விநியோகஸ்தரும் படங்களை விநியோகிப்பதில்லை என்று ஒருமனதாக முடிவெடுக்கப்பட்டுள்ளது. இந்த முடிவு வினியோகஸ்தர்களுக்கு விதிக்கப்படும் டிடிஎஸ் வரியை நீக்கும் வரை நடைமுறையில் இருக்கும்.
தற்போது திரையரங்க நுழைவுக் கட்டணங்களுக்கான ஜிஎஸ்டி 12% வரியுடன் கூடுதலாக உள்ளாட்சி அமைப்புகளுக்கு 8% கேளிக்கை வரி செலுத்துவதால் பார்வையாளர்களுக்கு கூடுதல் சுமையாக இருக்கும்.எனவே இதை தமிழக அரசு ரத்து செய்ய வேண்டும் என்று தீர்மானம் நிறைவேற்றப்பட்டுள்ளது.கூட்டத்தில் சென்னை, திருவள்ளூர், காஞ்சிபுரம் மாவட்ட திரைப்பட வினியோகஸ்தர்கள் சங்க தலைவர் டி.ராஜேந்தர், செயலாளர் மன்னன், கோவை திரைப்பட விநியோகஸ்தர்கள் சங்க தலைவர் ராஜமன்னார், நெல்லை திரைப்பட விநியோகஸ்தர்கள் சங்க உப தலைவர் பிரதாப் ராஜா, மதுரை திரைப்பட விநியோகஸ்தர்கள் சங்க செயலாளர் சாகுல் ஹமித், தமிழ் திரைப்பட விநியோகஸ்தர்கள் சங்க உறுப்பினர்கள் கலந்து கொண்டனர்.
10 சதவீத வரியை நீக்காவிட்டால் 27ம் தேதி முதல் புது படம் ரிலீஸ் இல்லை: திரைப்பட வினியோகஸ்தர்கள் சங்கம் அறிவிப்பு
05:03 am Mar 11, 2020 |
