திருமலை: திருப்பதி அருகே 2 கார்களில் கடத்திய 30 லட்சம் மதிப்புள்ள செம்மரக்கட்டைகளை போலீசார் பறிமுதல் செய்தனர். ஆந்திராவின் தடுக்குப்பேட்டை சோதனைச்சாவடியில் நகரி போலீசார் நேற்று முன்தினம் வாகன சோதனையில் ஈடுபட்டனர். அப்போது அவ்வழியாக வேகமாக வந்த 2 கார்களை நிறுத்தி சோதனையிட்டனர். அதில் 14 செம்மரக்கட்டைகள், 3 கத்திகள் இருப்பது தெரியவந்தது. இதையடுத்து காரில் வந்த 5 பேரை பிடித்து விசாரணை நடத்தினர். அவர்கள், சென்னையை சேர்ந்த ராணுவ வீரர் சுரேஷ், திருவண்ணாமலை மாவட்டம், போளூரை சேர்ந்த டிரைவர் மைக்கேல், தங்கராஜ், குப்புசாமி, முருகன் என தெரியவந்தது. இதுகுறித்து போலீசார் வழக்குப்பதிவு செய்து 5 பேரையும் கைது செய்தனர். பின்னர் அவர்களிடம் இருந்து 2 கார்கள், 30 லட்சம் மதிப்புள்ள செம்மரக்கட்டைகள், கத்திகளை பறிமுதல் செய்து விசாரணை நடத்தி வருகின்றனர். கடத்தலில் ஈடுபட்ட சுரேஷ், காஷ்மீரில் ராணுவத்தில் பணியாற்றி வருகிறார். விடுமுறையில் வந்த அவர் செம்மரக்கடத்தலில் ஈடுபட்டது குறிப்பிடத்தக்கது.
திருப்பதி அருகே காரில் கடத்திய 30 லட்சம் மதிப்புள்ள செம்மரக்கட்டைகள் பறிமுதல்: சென்னை ராணுவவீரர் உட்பட 5 பேர் கைது
12:46 am Feb 05, 2020 |
