திருமலை: திருப்பதி வெங்கடேஸ்வரா வன உயிரியல் பூங்காவில் 5 வெள்ளை புலிக்குட்டிகள் தங்களது தாயுடன் துள்ளி விளையாடும் குட்டிகளை ஏராளமானோர் பார்த்து வருகின்றனர். ஆசியாவிலேயே மிகப்பெரிய உயிரியல் பூங்கா திருப்பதி அலிபிரி சாலையில் வெங்கடேஸ்வரா வனவிலங்கு உயிரியல் பூங்கா உள்ளது. இங்கு மிகவும் அரிதாக காணக்கூடிய வெள்ளைப்புலிகள் பராமரிக்கப்பட்டு வருகிறது. சமீர்-ராணி என்ற இரண்டு ஜோடி வெள்ளை புலிகள் கடந்த 8 மாதங்களுக்கு முன்பு 3 ஆண் குட்டிகளும், 2 பெண் குட்டிகளும் ஈன்றது. ஆனால் இவற்றை பார்க்க பார்வையாளர்களுக்கு அனுமதி இல்லை. கூண்டில் வைத்து உயிரியல் பூங்கா அதிகாரிகள் பராமரித்து வந்தனர்.
8 மாதங்கள் நிறைவடைந்ததால் நேற்று இவற்றை பார்க்க வனத்துறை அனுமதி அளித்தது. இதையடுத்து இரண்டு பெரிய வெள்ளை புலிகளுடன் 5 குட்டி புலிகள் விளையாடுவதை பார்வையாளர்கள் மிகவும் ஆர்வத்துடன் பார்த்து வருகின்றனர். பார்வை நேரம் காலை 8 மணி முதல் மதியம் 2 மணி வரை என அறிவிக்கப்பட்டுள்ளது. இவற்றை பார்வையிட அனுமதி கொடுத்ததை அடுத்து அதிக அளவில் சுற்றுலா பயணிகளும், ஏழுமலையான் கோயிலில் சுவாமி தரிசனம் செய்ய வரும் பக்தர்களும் வன உயிரியல் பூங்காவிற்கு வந்து பார்வையிட்டு வருகின்றனர்.
ஆசியாவிலேயே மிகப்பெரிய திருப்பதி வன உயிரியல் பூங்காவில் 5 வெள்ளை புலிக்குட்டிகள்: பார்வையாளர்கள் ஆர்வம்
07:02 pm Dec 26, 2019 |
