2020-ம் ஆண்டு சூரியனை ஆராயும் விண்கலம் விண்ணில் செலுத்தப்படும்: இஸ்ரோ தலைவர் சிவன் பேட்டி

டெல்லி: விண்ணுக்கு மனிதனை அனுப்பும் ககன்யான் திட்டம் 2022-ம் ஆண்டு செயல்படுத்தப்படும் என இஸ்ரோ தலைவர் சிவன்  தெரிவித்துள்ளார். நிலாவில் இதுவரை எந்த நாடும் மேற்கொள்ளாத ஆய்வை இந்தியாவின் விண்வெளி ஆய்வு நிறுவனமான இஸ்ரோ மேற்கொள்ள  உள்ளது. இதற்கான சந்திரயான்-2 ஆய்வு விண்கலத்தை அடுத்த மாதம் 15-ம் தேதி இஸ்ரோ விண்ணில் செலுத்த உள்ளது.

மத்திய அமைச்சர் ஜித்தேந்திர சிங் பேட்டி:
 
சந்திரயான்-2 மற்றும் எதிர்காலத்தில் இந்திய மேற்கொள்ள உள்ள விண்வெளி திட்டங்கள் குறித்து டெல்லியில் செய்தியாளர்களிடம் பேசிய மத்திய  அணுசக்தி, விண்வெளித்துறை இணையமைச்சர் ஜித்தேந்திர சிங், அடுத்த மாதம் 15-ம் தேதி சந்திரயான் -2 விண்கலம் விண்ணில் செலுத்தப்பட  உள்ளது என்றார். மேலும் நாட்டின் 75 வது சுதந்திர தினத்தை ஒட்டி வருகிற 2022-ம் ஆண்டுக்குள் விண்வெளிக்கு இந்தியர்களை அனுப்பும்  ககன்யான் திட்டம் செயல்படுத்தப்படுமென அவர் குறிப்பிட்டார்.

10,000 கோடி ரூபாய் செலவிலான ககன்யான் திட்டத்தின் படி, இரண்டு அல்லது மூன்று பேர் விண்வெளிக்கு அனுப்பப் படுவார்கள் என்று அவர்  கூறினார். இதற்காக அமைக்கப்பட்டுள்ள ககன்யான் தேசிய ஆலோசனைக்குழு, திட்டத்தை கண்காணிக்கும் என்றும் அவர் தெரிவித்தார்.

இஸ்ரோ தலைவர் சிவன் பேட்டி:

தொடர்ந்து செய்தியாளர்களிடம் பேட்டியளித்த இஸ்ரோ தலைவர் சிவன், சந்திரயான் திட்டம் மட்டுமின்றி ககன்யான், சூரிய ஆய்வு ,வெள்ளி கிரக  ஆய்வு ஆகியவற்றிலும் இஸ்ரோ ஈடுபட உள்ளது என்றார். வருகிற 2020-ம் ஆண்டு சூரியனை ஆராயும் விண்கலம் விண்ணில் செலுத்தப்படும்  என்றும் அடுத்த இரண்டு அல்லது மூன்று ஆண்டுகளில் வெள்ளி கிரகத்தை ஆராய விண்கலத்தை அனுப்பும் திட்டமும் உள்ளது என்றார்.

இதே போல 2022-ம் ஆண்டுக்குள் ககன்யான் திட்டம் செயல்படுத்தப்படும் என்றும் இந்த திட்டத்தின் கீழ் விண்வெளிக்கு செல்ல உள்ள வீரர்கள்  அடுத்த 6 மாதங்களுக்குள் தேர்வு செய்யப்படுவார்கள் என்றார். தேர்ந்தெடுக்கப்பட்ட வீரர்களுக்கு இரண்டு ஆண்டுகள் தீவிர பயிற்சி அளிக்கப்படும்  என்றும், அதன் பின்னரே வீரர்கள் விண்வெளிக்கு அனுப்பி வைக்கப்படுவார்கள் என்றும் அவர் கூறினார். அடுத்த 5 முதல் 7 ஆண்டுகளுக்குள்  விண்வெளியில் இந்தியாவுக்கு என்று தனி ஆய்வகம் அமைக்கப்படும் என்று சிவன் தெரிவித்தார்.

Tags : Shiva ,ISRO , Sun, spacecraft, ISRO chief Shiva
× RELATED இஸ்ரோ தலைவர் சிவனுக்கென்று...