ரிஷப ராசி முதலாளி

என்னோட ராசி நல்ல ராசி-10

ரிஷப ராசிக்காரர் மண் ராசி என்பதால் ரியல் எஸ்டேட், உழவு கருவிகள் உட்கார்ந்த இடத்தில் செய்யும் கமிஷன் வியாபாரம், ஷேர் புரோக்கர், கடை, உணவகம் போன்றவை சிறப்பாக இருக்கும். சுக்கிரன் ராசி அதிபதியாக இருப்பதால் பெண்கள் தொடர்பான ஜவுளிக்கடை, ஃபேன்சி ஸ்டோர், நவரத்தின விற்பனை, இசைக்கருவிகள் மற்றும் இசைத்தட்டு விற்பனை, தொழில்முறை பாடகராதல். கணினி தொடர்பான தொழில் இசைக் கலைஞர் , நடனக் கலைஞர், நடிகர், மாடலிங் செய்தல் போன்றவை வெற்றி தரும். இவர் நன்கு யோசித்து எந்தத் தொழிலும் இறங்குவார். சிறிய வெற்றிலை பாக்கு கடை வைப்பதாக இருந்தாலும் அதையும் சரியாக செய்வார். அதில் நல்ல லாபமும் பார்ப்பார். எதிலும் இவருக்கு இரண்டாவது சிந்தனையே கிடையாது. தொழிலில் இறங்கிவிட்டால் பின்பு வெற்றிப் பாதையில் இவரது பயணம் ஆரம்பித்துவிடும்.

நிதானமான வளர்ச்சி

ரிஷப ராசிக்காரர் சிறியளவில் தொழில் தொடங்கினாலும் அலட்டிக்கொள்ளாமல் தன் கடின உழைப்பாலும் சாமர்த்தியத்தாலும் பெரியளவில் வளர்த்துக்கொண்டு
வருவார். டீக்கடையில் தொடங்கினாலும் நிதானமாக வளர்ந்து தன் ஐம்பது வயதில் பெரிய உணவகங்களைப் பல நாடுகளில் தொடங்கிவிடுவார். நிதானமாக செயல்பட்டாலும் தொடர்ந்து வளர்ச்சிப் பாதையிலேயே போவார். வரையறுக்கப்பட்ட கொள்கைகளையும் கோட்பாடுகளையும் விதிமுறையையும் தன் தொழிலில் பின்பற்றுவார்.

இவர் கீழ் பணி செய்வது பணியாளருக்கு எவ்வித சிரமத்தையும் தராது. இவர் நல்ல முதலாளியாக இருப்பார். அதிகம் தொணதொணக்க மாட்டார். [nagging]. அமைதியாக இருந்தாலும் அனைவரது பணித்திறனையும் நேர்மையையும் கவனித்துக்கொண்டே இருப்பார். யாராவது தொடர்ந்து ஏமாற்றி கொண்டிருந்தால் அவரிடம் அதிகம் பேசமாட்டார். திட்ட மாட்டார். அவரை விசாரிக்க மாட்டார். ‘கிளம்பு’ என்ற ஒற்றை சொல்லில் முடித்துவிடுவார். அதன் பின்பு அந்த ஆள் தலை கீழாக நின்று அழுதாலும் கும்பிட்டாலும் ‘நோ என்ட்ரி’ தான்.

உழைப்புக்கு மரியாதை

அசுர குருவான சுக்கிரனின் ராசி என்பதால் ரிஷப ராசிக்காரர்கள் எப்பேர்ப்பட்டவரையும் தன் கீழ் வைத்து வேலை வாங்கிவிடுவர். வேறு எவரிடமும் வேலை செய்யாதவர் கூட இவரிடம் வேலை செய்வார், காரணம் இவர் திறமையுள்ளவருக்கு நல்ல மரியாதையும் சுதந்திரமும் ஊக்கமும் கொடுப்பார். ஏதேனும் தவறு நடந்துவிட்டால் மேஷ ராசிக்காரர் மாதிரி குய்யோ முறையோ என்று கத்த மாட்டார். இனி இப்படி செய்யாதே என்பார். அந்த ஒரு வார்த்தையில் தவறு செய்தவர் திருந்திவிடுவார். மறு முறை அந்த தவறு நடக்காது. இவரும் கடுமையான உழைப்பாளி என்பதால் உழைப்புக்கு மதிப்பு கொடுப்பார். இவரும் மற்றவருடன் சேர்ந்து இரவு பகல் பாராமல் உழைப்பார். தன் முன்னேற்றம் ஒன்றையே குறிக்கோளாகக் கொண்டு செயல்படுவார்.

உலக வாழ்க்கை - இன்பம்

சுக்கிரனின் ஆதிபத்தியத்தில் பிறந்த ராசிக்காரர் என்பதால் உலக வாழ்க்கை இன்பங்களில் இவருக்கு நாட்டம் அதிகம் நல்ல சுவையான சாப்பாடு, தரமான உடை, குடியிருக்க வசதியான வீடு [சிறியதாவும் இருக்கலாம்] அமைதியான பணிச்சூழல் அன்பான சுற்றமும் நட்பும் என மகிழ்ச்சியாக வாழ்வார்கள். கூடுமானவரை பிக்கல் பிடுங்கலை தவிர்த்துவிடுவார். பெண்களிடம் பிரியமாய் இருப்பார். ஆனால் பாரம்பரியம் மாறாமல் பெண் பணியாளர்கள் இருக்க வேண்டும் என்று எதிர்பார்ப்பார். ஆணாதிக்கவாதி போல நடந்துகொள்வார். பணித்தளத்தில் பெண்கள் சத்தமாகப் பேசுவதும் அரட்டை அடிப்பதும் இவருக்குப் பிடிக்காது. அறிவும் திறமையும் மிக்க பெண்களுக்கு நல்ல மரியாதை கொடுப்பார்.

புதிய விஷயங்களில் ஆர்வம்

ரிஷப ராசி முதலாளிக்கு யாரும் தன்னிடம் வந்து நடைமுறைக்கு ஒவ்வாத கதைகளை கற்பனைகளைச் சொல்வது பிடிக்காது. நடக்கக்கூடிய விஷயங்களையே அவர் பேசவும் கேட்கவும் விரும்புவார். தனது தொழில் தொடர்பான புதிய விஷயங்கள் புதிய கண்டுபிடிப்புகள் போன்றவற்றை ஆர்வமாகக் கேட்பார். இத்தகைய விஷயங்களைத் தேடிப் படித்து வந்து சொல்பவரை அவருக்கு மிகவும் பிடிக்கும். எப்போதும் தன் அலுவலகத்தில் ஊதுபத்தி, சாம்பிராணி போன்ற நறுமணம் இருக்க வேண்டும் என்பது இவர் ஆசை. சுத்தம், சுகாதாரம், நறுமணம், நல்ல பளிச்சென்ற நிறம், இன்னிசை, சாமி படம், அதற்கு பூ மாலை ஆகியவை இவர் இருக்குமிடத்தில் இருக்கும்; இருக்க வேண்டும்.

பக்தி உண்டு; நன்கொடை இல்லை

ரிஷப ராசி முதலாளிக்குத் தெய்வ பக்தி உண்டு. ஆனால் மூடப் பழக்க வழக்கங்களை வெறுப்பார். சாமி பெயரில் கோயில் குளம் விழா விசேஷம் என்று யாராவது பணம் கேட்டால் தர மாட்டார். ஆனால் இவருக்கே ஒரு கோயில் விசேஷம் சிறப்பானது எனத் தோன்றினால் அல்லது கோயிலுக்கு ஒரு மண்டபம் கட்ட வேண்டும் என்று நினைத்தால் அதைச் செய்து தருவார். அப்போது கஞ்சத்தனம் பார்க்கமாட்டார். பொதுவாக இவர் தன் குடும்பம், தன் தொழில், மேம்பாடு, தன் சுகம் பற்றிய ஆர்வம் அதிகம் உடையவர். பொது நலச் சிந்தனை மிகவும் குறைவு. இவர் செய்யாவிட்டாலும் இவர் நண்பர் மூலமாகக் கூட சிபாரிசு செய்வதற்கு தயங்குவார். பணியாளர்கள் நலம் குறித்து விசாரித்துத் தெரிந்துகொள்வதில் கூட ஆர்வம் காட்ட மாட்டார்.

உடையிலும் பேச்சிலும் நாகரீகம்

ரிஷப ராசி முதலாளி தன் பணியாட்கள் கலைந்த தலையுடன் நாகரீகம் என்ற பெயரில் சாயம் போன ஜீன்சை போட்டுக்கொண்டு அலுவலகத்துக்கு வருவதை விரும்பமாட்டார். நேர்த்தியாக  உடை உடுத்தி, ‘நீட்டாக’ தலை சீவி வருவதையே விரும்புவார். அலுவலர்கள் சொன்னதையே திரும்ப திரும்ப சொல்வது, பயனற்ற வெற்று சொற்களை பேசுவது ஸ்லேங்க் பாஷையில் பேசுவது, தேவையற்ற கமெண்ட் கேலி கிண்டல் பேசுவது போன்றவை இவருக்குச் சுத்தமாகப் பிடிக்காது. ‘சுருங்கச் சொல்லி விளங்க வைத்தலே’ இவரது சொல்லாடல் பாணியாகும். தம் பணியாட்களிடம் அதிகம் பேச மாட்டார். சில சொற்களில் நல்ல வழி காட்டிவிடுவார்.

‘பேச்சு படிச்ச நாய் வேட்டைக்கு உதவாது’ என்பது இவருக்குப் பிடித்த பழமொழி

இவர் பேசினால்...

ரிஷப ராசிக்காரர் எந்தப் பொருளையும் நயமாகப் பேசி கஸ்டமர் தலையில் கட்டி விடும் பழக்கம் கொண்டவர் கிடையாது . அதனால் இவர் சேல்ஸ், மார்க்கெட்டிங் போன்ற துறைகளை விரும்ப மாட்டார். ஒருவேளை மண் தொழில் சார்ந்த வேளான்மைக் கருவிகள் விற்பனை செய்தால் குறிப்பிட்ட கருவியின் செயல் திறன், குறைவான மின் சக்தி , மிச்சமாகும் மனித உழைப்பு பற்றி அழகாக வாடிக்கையாளரிடம் எடுத்துரைப்பார். கூடுதலாக எதுவும் பேசமாட்டார். சுக்கிரனுக்குரிய நவரத்தின வியாபாரம் செய்தால் குறிப்பிட்ட இரத்தினத்தின் மதிப்பு, சக்தி, அணிந்தோர் பெற்ற பயன், மறுவிற்பனை மதிப்பு போன்றவற்றைத் தெளிவாக எடுத்துரைப்பார். வேறு பந்தா பேச்செல்லாம் கிடையாது. வெட்டித்தனமான பேச்சு இவரிடம் எப்போதும் இருக்காது. சூழ்நிலைக்குத் தேவையற்ற ஒரு சொல்லைக் கூட சொல்லி அவர் தன் வாக்கு சக்தியை வீணாக்க மாட்டார். மொத்தத்தில் ரிஷப ராசி முதலாளி ஒரு ‘ஜெம்’ என்று கூறலாம்.

(தொடரும்)
முனைவர் செ. ராஜேஸ்வரி