டெல்லியில் பிரமாண்ட திமுக அலுவலகம்: மு.க.ஸ்டாலின் இன்று திறந்து வைக்கிறார்.! கோலாகல விழாவில் ஒன்றிய அமைச்சர்கள், சோனியா, ராகுல் உள்பட பல்வேறு கட்சி தலைவர்கள் பங்கேற்பு

சென்னை: டெல்லியில் பிரமாண்டமாக கட்டப்பட்டுள்ள திமுகவின் தலைமை அலுவலகமான அண்ணா- கலைஞர் அறிவாலயம் திறப்பு விழா இன்று மாலை கோலாகலமாக நடைபெறுகிறது. தமிழக முதல்வர் மு.க.ஸ்டாலின் திறந்து வைக்கிறார். இதில் ஒன்றிய அமைச்சர்கள், சோனியா, ராகுல் உள்பட பல கட்சித் தலைவர்கள் பங்கேற்கின்றனர். திமுக அலுவலக திறப்பு விழாவையொட்டி டெல்லி நகரமே விழாக்கோலம் பூண்டுள்ளது. டெல்லியில் எத்தனையோ தேசிய மற்றும் மாநில கட்சிகளுக்கு கட்சி அலுவலகங்கள் இருந்தாலும் கூட திமுக கட்டி எழுப்பியிருக்கும் அண்ணா-கலைஞர் அறிவாலயம் தான் பலரையும் திரும்பிப் பார்க்க வைத்துள்ளது. அகில இந்திய அளவில் இப்போது முக்கியமான கட்சியாக திமுக மாறியுள்ளது குறிப்பிடத்தக்கது. திமுக ஏற்படுத்திய திராவிட மாடல் ஆட்சி நாட்டில் உள்ள அனைத்து முதல்வர்களையும் திரும்பி பார்க்க வைத்துள்ளது. திமுகவின் தலைமை அலுவலகமான அண்ணா அறிவாலயம் சென்னை தேனாம்பேட்டையில் உள்ளது. இந்த அறிவாலயத்தை கட்டி சென்னையின் ஒரு முக்கிய அடையாளமாக மாற்றிய பெருமை மறைந்த கலைஞருக்கு உண்டு. பார்த்துப் பார்த்து இந்தக் கட்டிடத்தைக் கட்டினார். கட்டுமான வேலைகள் நடக்கும் போது தினசரி அங்கு வந்து நேரில் பார்த்து அந்தக் கட்டிடம் அழகுற எழும்பி நிற்பதில் பெரும் பங்காற்றினார். தமிழகத்திலேயே ஒரு கட்சி அலுவலகத்தை இத்தனை கலை நயத்துடன் கட்டிய ஒரே தலைவர் கலைஞர்தான் தான் என்று பல தலைவர்கள் புகழ்ந்து வருவது குறிப்பிடத்தக்கது. தமிழகத்தில் அதுவரை கட்சி அலுவலகம் என்றால் சாதாரண கட்டிடமாகத் தான் இருக்கும். ஆனால் அண்ணா அறிவாலயம் தான் கலை நயத்துடன் கூடிய ஒரு பிரமாண்ட மாளிகையாக உருவெடுத்தது. அதே வழியில் இப்போது திமுகவுக்கு இன்னொரு பெருமையாக முதல்வர் மு.க.ஸ்டாலின் டெல்லியில் பிரமாண்டமாக அண்ணா-கலைஞர் அறிவாலயத்தை உருவாக்கியுள்ளார். டெல்லி தீன்தயாள் மார்க் பகுதியில் தான் திமுக தனது இந்த புதிய மாளிகையை எழுப்பியுள்ளது. கடந்த ஆண்டு கட்டுமான பணிகள் தொடங்கி முடிக்கப்பட்டது. டெல்லி அரசியலின் மையப்புள்ளியாக மாற உள்ள கட்டிடம் இன்று திறக்கப்படுகிறது. இந்த திறப்பு விழாவில் பங்கேற்குமாறு பிரதமர் நரேந்திர மோடி, காங்கிரஸ் தலைவர் சோனியா காந்தி தொடங்கி அனைத்துத் தலைவர்களுக்கும் திமுக அழைப்பு விடுத்துள்ளது. இது அனைவரது கவனத்தையும் ஈர்த்துள்ளது. 3 மாடிகளுடன் கூடியதாக உருவாகியுள்ளது. பிரமாண்ட தூண்கள், அழகிய வடிவமைப்பு என அழகு மாளிகையாக இது உருவெடுத்துள்ளது. அனைத்து நவீன வசதிகளுடன் கூடியதாக அண்ணா கலைஞர் அறிவாலயத்தை திமுக கட்டியுள்ளது.இந்த கட்டடத்தின் முன் பகுதியில் அண்ணா, கருணாநிதி ஆகியோரது சிலைகளும் வைக்கப்பட்டுள்ளன. மேலும் திமுக கொடி பறக்கும் வகையில் கொடி கம்பம் அமைக்கப்பட்டுள்ளது. இப்படிப்பட்ட பிரமாண்ட அறிவாலயத்தை முதல்வரும், திமுக தலைவருமான மு.க.ஸ்டாலின் இன்று மாலை 5 மணி அளவில் திறந்து வைக்கிறார். பல்வேறு கட்சி தேசிய தலைவர்களுக்கும் அழைப்பு விடுத்திருப்பதால் இன்று மாலை நடக்கும் திறப்பு விழாவில் காங்கிரஸ் தற்காலிக தலைவர் சோனியாகாந்தி, முன்னாள் தலைவர் ராகுல்காந்தி மற்றும் காங்கிரஸ் தலைவர்கள், மார்க்சிஸ்ட் தேசிய செயலாளர் சீத்தாராம் யெச்சூரி, இந்திய கம்யூனிஸ்ட் தேசிய செயலாளர் டி.ராஜா மற்றும் திரிணாமுல் காங்கிரஸ், ராஷ்டிரிய ஜனதாதளம், தேசிய மாநாட்டுக் கட்சி, தெலங்கானா ராஷ்டிரிய சமிதி உள்ளிட்ட பல்வேறு கட்சி தலைவர்கள்  கலந்து கொள்கின்றனர். அவர்களை முதல்வர் மு.க.ஸ்டாலின் வரவேற்க உள்ளார். டெல்லியில் உள்ள தமிழ்நாடு புதிய இல்லத்தில் தங்கியிருக்கும் முதல்வர் மு.க.ஸ்டாலின் இன்று காலை 11 மணி அளவில் அங்கிருந்து புறப்பட்டு புதிய கட்டிடத்துக்கு வருகிறார். அங்கு பிரமாண்டமாக கட்டப்பட்டுள்ள புதிய கட்டிடத்தையும், விழா ஏற்பாடுகள் குறித்தும் கட்சியின் மூத்த நிர்வாகிகளுடன் ஆலோசனை நடத்துகிறார். பின்னர் மாலை 5 மணி அளவில் அண்ணா – கலைஞர் அறிவாலயத்தை முதல்வர் மு.க.ஸ்டாலின் திறந்து வைக்கிறார். பின்னர் கட்சி அலுவலகத்தின் முன் பகுதியில் உள்ள திமுக கொடியை ஏற்றி வைக்கிறார். பின்னர் அண்ணா, கலைஞரின் சிலையையும், பேராசிரியர் அன்பழகன் பெயரிலான நூலகத்தையும் முதல்வர் திறந்து வைக்கிறார். இந்த நிகழ்ச்சி திமுக பொதுச்செயலாளர் துரைமுருகன் தலைமையிலும், பொருளாளர் டி.ஆர்.பாலு எம்பி முன்னிலையிலும் நடைபெறுகிறது. அண்ணா- கலைஞர் அறிவாலய திறப்பு விழா நிகழ்ச்சியால், இந்த கட்டிடம் அமைந்துள்ள தீன்தயாள் மார்க் பகுதியே விழாக் கோலம் பூண்டுள்ளது. அந்த பகுதி முழுவதும் அலங்கார விளக்குகளால் அலங்கரிக்கப்பட்டுள்ளது. மேலும் கட்டிடத்தை சுற்றி திமுக கொடி பறக்க விடப்பட்டுள்ளது. திறப்பு விழாவில் கலந்து கொள்ள தமிழக அமைச்சர்கள், மூத்த தலைவர்கள், எம்பிக்கள், எம்எல்ஏக்கள் மற்றும் பல்வேறு மாநிலங்களில் இருந்தும்  கட்சியினர் ஏராளமானோர் டெல்லிக்கு படையெடுத்து வருகின்றனர். இதனால் திறப்பு விழா டெல்லியில் களை கட்டியுள்ளது….

The post டெல்லியில் பிரமாண்ட திமுக அலுவலகம்: மு.க.ஸ்டாலின் இன்று திறந்து வைக்கிறார்.! கோலாகல விழாவில் ஒன்றிய அமைச்சர்கள், சோனியா, ராகுல் உள்பட பல்வேறு கட்சி தலைவர்கள் பங்கேற்பு appeared first on Dinakaran.