சென்னை: சென்னை ராஜிவ் காந்தி சாலையில் டைடல் பார்க் சந்திப்பில் அமைந்துள்ள போக்குவரத்து சமிக்ஞையில் தற்போது வாகனங்கள் வெகுநேரம் காத்திருக்க வேண்டிய சூழலைக் கருத்தில் கொண்டு, டைடல் பார்க் சந்திப்பில் ரூ.27.50 கோடி செலவில் யு வடிவ மேம்பாலமும், பாதசாரிகள் சாலையை கடக்க ரூ.11.30 கோடி செலவில் திருவான்மியூர் மின்சார ரயில் நிலையம் முதல் டைடல் பார்க் மேம்பாலம் வரையில் மேற்கு நிழற்சாலை சாலையின் குறுக்காக ஒரு நடைமேம்பாலமும் கட்டப்பட்டுள்ளது.
திருவான்மியூர் பகுதியில் இருந்து, மத்திய கைலாஷ் மற்றும் தரமணி சி.எஸ்.ஐ.ஆர் சாலை நோக்கி செல்லும் வாகனங்கள் டைடல் பார்க் சந்திப்பில் போக்குவரத்து சமிக்ஞைக்காக காத்திருக்காமல் இந்த பாலத்தின் வழியாக ஏறி அந்தந்த சாலைகளில் இறங்கி விரைவாக செல்ல இயலும். இந்த புதிய நடை மேம்பாலம், திருவான்மியூர் பறக்கும் ரயில் நிலையம் முன்பாக ராஜிவ் காந்தி சாலையின் குறுக்கே ஏற்கனவே உள்ள இரும்பு நடைமேம்பாலத்துடன் இணைக்கப்பட்டுள்ளது.
பாதசாரிகள் புதிய நடை மேம்பாலம் வழியாக மேற்கு நிழற்சாலை சாலையை பாதுகாப்பாக கடந்து திருவான்மியூர் பறக்கும் ரயில் நிலையம் சென்று வரவும், ராஜிவ் காந்தி சாலையை கடந்து டைடல் பார்க் உள்ளிட்ட பல்வேறு தகவல் தொழில்நுட்ப நிறுவனங்களுக்கு சிரமமின்றி சென்று வரவும் இயலும். இதனை துணை முதல்வர் உதயநிதி ஸ்டாலின் நேற்று தொடங்கி வைத்தார்.
இந்நிகழ்ச்சியில், நெடுஞ்சாலை துறை அமைச்சர் எ.வ.வேலு, மருத்துவம் மற்றும் குடும்ப நலத்துறை அமைச்சர் மா.சுப்பிரமணியன், தென் சென்னை நாடாளுமன்ற உறுப்பினர் தமிழச்சி தங்க பாண்டியன், வேளச்சேரி சட்டமன்ற உறுப்பினர் ஹசன் மவுலானா ஆகியோர் முன்னிலை வகித்தனர்.
சோழிங்கநல்லூர் சட்டமன்ற உறுப்பினர் அரவிந்த் ரமேஷ், நெடுஞ்சாலைகள் மற்றும் சிறு துறைமுகங்கள் துறை செயலாளர் செல்வராஜ், தமிழ்நாடு சாலை மேம்பாட்டு நிறுவன நிர்வாக இயக்குநர் பாஸ்கர பாண்டியன், சென்னை கலெக்டர் ரஷ்மி சித்தார்த் ஜகடே, நெடுஞ்சாலைத்துறை தலைமைப் பொறியாளர் பழனிவேல், மற்றும் கண்காணிப்பு பொறியாளர், கோட்டப் பொறியாளர் உள்ளிட்டஅரசு உயர் அலுவலர்கள் கலந்து கொண்டனர்.
The post டைடல் பார்க் சந்திப்பில் கட்டப்பட்டுள்ள ‘யு’ வடிவ மேம்பாலம் திறப்பு: துணை முதல்வர் உதயநிதி ஸ்டாலின் திறந்து வைத்தார் appeared first on Dinakaran.
