வாந்தி மற்றும் மயக்கம் காரணமாக சிகிச்சை பெற்று வரும் நபர்களை நேரில் சந்தித்து நலம் விசாரித்தார் அமைச்சர் மா.சுப்பிரமணியன்

சென்னை: மருத்துவம் மற்றும் மக்கள் நல்வாழ்வுத்துறை அமைச்சர் மா.சுப்பிரமணியன் அவர்கள், செங்கல்பட்டு மாவட்டம், தாம்பரம் அரசு மருத்துவமனையில் வாந்தி மற்றும் மயக்கம் காரணமாக சிகிச்சை பெற்று வரும் நபர்களை இன்று (05.12.2024) நேரில் சந்தித்து நலம் விசாரித்து, அவர்களுக்கு வழங்கப்படும் சிகிச்சைகள் குறித்து மருத்துவர்களிடம் கேட்டறிந்தார்.

பின்னர் மருத்துவம் மற்றும் மக்கள் நல்வாழ்வுத்துறை அமைச்சர் செய்தியாளர்களிடம் தெரிவித்ததாவது: பல்லாவரம் சட்டமன்ற தொகுதிக்குட்பட்ட காமராஜர் நகர், பல்லாவரம் ஆகிய பகுதிகளிலும், ஆலந்தூர் பகுதிக்குட்பட்ட மணல்மேடு என்கின்ற பகுதியிலும் கடந்த 3 நாட்களாக அப்பகுதியில் உள்ள மக்களுக்கு வயிற்றுப்போக்கு அறிகளுடன் 34 பேர் தாம்பரம் அரசு மருத்துவமனைக்கு புறநோயாளிகளாக வந்து சென்றிருக்கிறார்கள். இதில் 14 பேர் புறநோயாளிகளாக சிகிச்சை பெற்று வீட்டிற்கு அனுப்பி வைக்கப்பட்டிருக்கிறார்கள். 19 பேர் உள்நோயாளிகளாக அனுமதிக்கப்பட்டு சிகிச்சை பெற்று வருகிறார்கள்.

மேலும் 3 பேரில் இராஜீவ்காந்தி அரசு பொது மருத்துவமனைக்கு ஒருவரும், தனியார் மருத்துவமனையில் 2 பேர் என வெவ்வேறு மருத்துவமனைகளில் சிகிச்சை பெற்று வருகிறார்கள். தற்போது சிகிச்சையில் உள்ளவர்களை பொறுத்தவரை தாம்பரம் அரசு மருத்துவமனையில் 19 பேரும், இராஜீவ்காந்தி அரசு பொதுமருத்துவமனையிலும், தனியார் மருத்துவனையிலும் சிகிச்சை பெற்று வருகிறார்கள். இவர்கள் அனைவருக்கும் ஒரே மாதிரியான பாதிப்புகள் தான் அதாவது வயிற்றுப்போக்கு. தாம்பரம் அரசு மருத்துவமனையைப் பொறுத்தவரை வயிற்றுப்போக்கிற்காக தொடர்ச்சியாக அனுமதிக்கப்பட்டதும் சிறுகுறு மற்றும் நடுத்தர தொழில் நிறுவனங்கள் துறை அமைச்சர் அவர்களும், மாவட்ட ஆட்சித் தலைவர், மாநகராட்சி ஆணையர், வணக்கத்திற்குரிய மேயர், தொகுதியின் சட்டமன்ற உறுப்பினர் போன்ற அனைத்து மக்கள் பிரதிநிதிகளும் விரைந்து வந்து இன்று காலை பார்த்துவிட்டு சென்றிருக்கிறார்கள்.

அந்தவகையில் இன்று உள்நோயாளிகளாக அனுமதிக்கப்பட்டிருக்கின்ற 19 பேரையும், தனித்தனியாக சந்தித்து அவர்களுக்கு அளிக்கப்பட்டு வரும் சிகிச்சைகள் குறித்து கேட்டறிந்து நலம் விசாரிக்கப்பட்டது. இதில் காமராஜர் பகுதியைச் சார்ந்த திருவீதி, வயது 56 மற்றும் மோகனரங்கம், வயது 42 ஆகிய 2 பேர் இறந்த நிலையிலேயே மருத்துவமனைக்கு அழைத்து வரப்பட்டிருக்கிறார்கள். இவர்கள் 2 பேரின் உடல்களை பிரேத பரிசோதனைக்காக பிணவறையில் வைக்கப்பட்டுள்ளது. பிரேத பரிசோதனை விரைவாக நடைபெறவிருக்கிறது. இந்நிலையில் இவர்களுக்கான பாதிப்பு என்னவாக இருக்கும் என்று ஆராய்வதற்கு மாவட்ட ஆட்சித் தலைவர், அமைச்சர், சட்டமன்ற உறுப்பினர்கள் இவர்கள் எல்லாம் சம்மந்தப்பட்ட பகுதிகளுக்கே சென்று ஆய்வுகள் மேற்கொண்டிருக்கிறார்கள்.

குடிநீரில் ஏதாவது பாதிப்பு இருக்குமா என்கின்ற சந்தேகம். மணல்மேடு பகுதியில் இருந்துதான் இவர்களுக்கு குடிநீர் விநியோகம் செய்யப்பட்டு வருகிறது. எனவே குடிநீரின் மாதிரியை கிண்டி கிங் நோய்த்தடுப்பு நிலையத்தில் பரிசோதனைக்காக அனுப்பியிருக்கிறார்கள். பொதுவாக குடிநீர் மாதிரி பரிசோதனை முடிவு என்பது வருவதற்கு 3 நாட்கள் ஆகும். ஆனாலும்கூட பிரச்சினையின் தீவிரத்தன்மையைக் கருத்தில் கொண்டு மிக விரைவில் பரிசோதனை முடிவுகளை தர வலியுறுத்தியிருக்கிறோம்.

இந்த நிலையில் நம்முடைய துறையின் சார்பில் அலுவலர்கள், மாவட்ட ஆட்சித் தலைவர் அவர்களுடைய அறிவுறுத்தலுக்கு ஏற்ப, அந்த பகுதியைச் சுற்றி 6 இடங்களில் மருத்துவ முகாம்கள் போடப்பட்டு மக்களுக்கு அங்கேயே போதுமான மருத்துவ வசதிகளை செய்துகொண்டிருக்கிறார்கள். தொடர்ந்து பல்லாவரம் சட்டமன்ற உறுப்பினர் காலையிலிருந்து இங்கே வந்து அவர்களுக்கு தேவையான உதவிகளை செய்துகொண்டிருக்கிறார். இந்த மருத்துவமனையை பொருத்த வரை அவர்களுக்கு தேவையான மருத்துவ வசதிகளும், மருந்து வசதிகளும் போதுமான அளவுக்கு கையிருப்பில் இருக்கிறது.

இன்னொருவர் 88 வயதான வரலட்சுமி என்பவர் ஏற்கனவே பல நாட்களாக படுத்த படுக்கையாக இருப்பவர். அவரும் இறந்திருக்கிறார் என்ற செய்தியும் சொல்லப்பட்டிருக்கிறது. திருவீதியும், மோகனரங்கமும் இறந்த நிலையிலேயே மருத்துவமனைக்கு அழைத்து வரப்பட்டிருக்கிறார்கள். இவர்கள் இறப்புக்கான காரணம் பிரேத பரிசோதனை முடிவில் நிச்சயமாக தெரியவரும். அதையும் கடந்து தற்போது குடிநீரின் மாதிரி பரிசோதனைக்கு அனுப்பப்பட்டிருக்கிறது.

குடிநீரில் ஏதாவது பாதிப்பு இருக்கிறதா எனவும் விரைவில் கண்டறியப்படவிருக்கிறது. உடனடியாக தாம்பரம் மாநகராட்சி ஆணையர் இந்த குடிநீரை இனிமேல் பருகாதவாறு தடை விதித்துள்ளார்கள். அதற்கு பதிலாக தாம்பரம் மாநகராட்சியின் சார்பில் வாகனங்களின் மூலம் குடிநீர் விநியோகிப்பதற்கான ஏற்பாடுகளை செய்திருக்கிறார். அந்த வகையில் தமிழ்நாடு முதலமைச்சர் அவர்களுடைய அறிவுறுத்தலுக்கேற்ப தீவிர நடவடிக்கைகள் எடுக்கப்பட்டு வருகிறது.

எதிர்க்கட்சி தலைவர் எடப்பாடி பழனிச்சாமி பொதுவாகவே எந்த விஷயத்தை எடுத்தாலும் ஒரு பதட்டத்தை ஏற்படுத்துகின்ற வகையிலேயே செய்திகளை சொல்வதும், தொடர்ந்து பதட்ட சூழலை உருவாக்குவது மாதிரியான செய்திகளை பதிவிடுவதுமே வாடிக்கையாக கொண்டிருக்கிறார். அந்த வகையில் தற்போதும்கூட இந்த மருத்துவமனையில் 30 பேர் அனுமதிக்கப்பட்டிருப்பதாகவும், 3 பேர் இறந்திருப்பதாகவும் என்ற செய்தியை சொல்லியிருக்கிறார். இப்பொழுது இங்கு இருப்பவர்கள் நேரடியாக நாங்களும் பார்த்தோம், நீங்களும் பார்க்கிறீர்கள், 19 பேர் இருக்கிறார்கள் என்பது உண்மை.

இறந்தவர்கள் 2 பேரும் இறந்த நிலையில்தான் மருத்துவமனைக்கே அழைத்துவரப்பட்டிருக்கிறார்கள். படுத்த படுக்கையாக இருந்த 88 வயதுடைய நபர் ஒருவர் இறந்திருக்கிறார். என்றாலும் இவர்களுடைய இறப்புக்கான காரணம் இன்னும் இரண்டு நாட்களில் பிரேதப் பரிசோதனைக்குப் பிறகும், குடிநீர் மாதிரி பரிசோதனைக்குப் பிறகும் தெரியவரும் என்று மருத்துவம் மற்றும் மக்கள் நல்வாழ்வுத்துறை அமைச்சர் மா.சுப்பிரமணியன் செய்தியாளர்களிடம் தெரிவித்தார்.

இந்நிகழ்வில், செங்கல்பட்டு மாவட்ட ஆட்சித்தலைவர் ச.அருண்ராஜ், பல்லாவரம் சட்டமன்ற உறுப்பினர் இ.கருணாநிதி, மேயர் வசந்தகுமாரி கமலக்கண்ணன், நகராட்சி ஆணையாளர் சீ.பாலச்சந்தர், மண்டலக்குழுத் தலைவர் இ.ஜோசப் அண்ணாதுரை மற்றும் பலர் உடனிருந்தனர்.

The post வாந்தி மற்றும் மயக்கம் காரணமாக சிகிச்சை பெற்று வரும் நபர்களை நேரில் சந்தித்து நலம் விசாரித்தார் அமைச்சர் மா.சுப்பிரமணியன் appeared first on Dinakaran.