சென்னை: சென்னை-கும்மிடிப்பூண்டி இடையே மூன்றாவது மற்றும் நான்காவது ரயில் பாதை அமைப்பதற்கான இட ஆய்வு முடிந்து, ரயில்வே வாரியத்தின் ஒப்புதலுக்காக காத்திருப்பதாக ரயில்வே அதிகாரி தெரிவித்துள்ளார்.
தெற்கு ரயில்வேயில் முக்கியமான கோட்டமாக சென்னை ரயில்வே கோட்டம் உள்ளது. சென்னை மற்றும் அருகிலுள்ள மாவட்டங்களில் போக்குவரத்து தேவையைப் பூர்த்தி செய்வதில் இக்கோட்டம் பெரும் பங்கு வகிக்கிறது. 697 கி.மீ தொலைவுக்கான எல்லையை இந்த கோட்டம் கொண்டுள்ளது. இந்த ரயில்வே கோட்டத்தின் கீழ், சென்னை சென்ட்ரல்- திருவள்ளூர் மற்றும் அரக்கோணம் மார்க்கம், சென்னை சென்ட்ரல்-பொன்னேரி- கும்மிடிப்பூண்டி மார்க்கம், சென்னை கடற்கரை- தாம்பரம்- செங்கல்பட்டு மார்க்கம், சென்னை கடற்கரை-வேளச்சேரி மார்க்கம் ஆகிய மார்க்கங்களில் ரயில்கள் இயக்கப்பட்டு வருகின்றன.
இந்த மார்க்கங்கள் வழியாக இயக்கப்படும் மின்சார ரயில்கள், விரைவு ரயில்கள் பயணிகளுக்கு பேருதவியாக இருக்கின்றன. சென்னைக்கு அருகில் உள்ள மாவட்டங்களில் இருந்து வேலைக்காகவும், கல்விக்காகவும் நாள்தோறும் லட்சக்கணக்கானனோர் நகரத்துக்கு வந்து செல்கின்றனர். மின்சார ரயில்களைப் பொறுத்தவரை சுமார் 650 சேவைகள் வழங்கப்படுகின்றன. இந்த ரயில்களில் நாள்தோறும் சுமார் 10 லட்சம் பேர் பயணிக்கின்றனர். குறைவான கட்டணம், குறிப்பிட்ட இடத்தை விரைவாக அடையும் வசதி ஆகியவற்றால், ஏழை, நடுத்தர மக்களுக்கு மின்சார ரயில்கள் வரப்பிரசாதமாக உள்ளன. புறநகர் ரயில்சேவை போல, நெடுந்தொலைவுக்கு செல்லும் விரைவு ரயில்களும் இந்த வழித்தடங்கள் வழியாக இயக்கப்படுகின்றன.
சென்னை சென்ட்ரல், எழும்பூர் ஆகிய ரயில் நிலையங்களில் இருந்து தென், மத்திய, மேற்கு மாவட்டங்களுக்கும், வடமாநிலங்களுக்கும் நாள்தோறும் 250-க்கும் மேற்பட்ட விரைவு ரயில்கள், மெயில், அதிவிரைவு ரயில்கள் இயக்கப்படுகின்றன. இருப்பினும், இந்த ரயில்கள் எல்லா தரப்பு மக்களுக்கும் பயனுள்ளதாக அமையவில்லை என்பதே உண்மை. சென்னை கடற்கரை – தாம்பரம் வரை இரு மார்க்கமாக தினசரி 250 மின்சார ரயில் சேவை வழங்கப்படுகின்றன. நெரிசல் மிகுந்த நேரங்களில் 7 நிமிடத்துக்கு ஒரு மின்சார ரயிலும், மற்ற நேரங்களில் 10 நிமிடத்துக்கு ஒரு ரயிலும் இயக்கப்படுகிறது. இதுதவிர, சென்னை எழும்பூரில் இருந்து புறப்படும் விரைவு ரயில்கள் அடுத்த நிறுத்தமாக தாம்பரம் ரயில்நிலையத்தில் நின்று செல்கிறது. இது தென் சென்னை பகுதியில் வசிக்கும் மக்களுக்கு பேருதவியாக இருக்கிறது.
அதேநேரத்தில், சென்னை சென்ட்ரல்-கும்மிடிப்பூண்டி ஆகிய மார்க்கங்களில் கூடுதல் மின்சார ரயில்சேவை இல்லாததால், பயணிகள் நெரிசலுடன் பயணிக்கும் நிலை ஏற்படுகிறது. மேலும் விரைவு ரயில்கள் நின்று செல்ல நிறுத்தம் வழங்கப்படாததால் நெடுந்தொலைவு போக்குவரத்தை பயன்படுத்த முடியாத நிலையில் இப்பகுதி மக்கள் உள்ளனர். அடிக்கடி இப்பகுதியில் மின்சார ரயில்கள் சிக்னல் கிடைக்காமல் மணிக்கணக்கில் நிற்க வேண்டிய சூழல் ஏற்பட்டுள்ளது. இதனால் வேலை, பள்ளி, கல்லூரிக்கு செல்லும் மாணவர்கள் பாதிக்கப்படுகின்றனர். 1 மணி நேரத்தில் செல்ல வேண்டிய பயணம் 2 மணி நேரமாக உள்ளது.
இது குறித்து ரயில் பயணிகள் கூறியதாவது:
சென்னை-கும்மிடிப்பூண்டி இடையே உள்ள உள்ளூர் ரயில்கள் சாலை மார்க்கமாக பயண நேரத்தை விட குறைந்தது 40-50 நிமிடம் அதிகமாக எடுத்துக் கொள்கிறது, புறநகர் ரயில்களுக்கு பிரத்யேக நடைபாதையை அமைக்குமாறு அதிகாரிகளுக்கு பல முறை மனு அளித்துள்ளோம். தென்சென்னை மற்றும் வட சென்னைக்கும் நிறைய வித்தியாசம் இருக்கிறது. தென் சென்னை பகுதியில் பல போக்குவரத்து வசதிகள் இருக்கிறது. மேலும், அத்திப்பட்டு புதுநகர் முதல் கும்மிடிப்பூண்டி வரையிலான 25 கி.மீ தூரத்தில் மூன்றாவது மற்றும் நான்காவது பாதை அமைக்க வேண்டும். சென்னையில் இருந்து கும்மிடிப்பூண்டி வரையிலான 46 கி.மீ. பயணத்துக்கு ரயில்கள் இரண்டு மணி நேரம் எடுக்கும். அதே நேரத்தில் சென்னை-செங்கல்பட்டு மற்றும் சென்னை-அரக்கோணம் வழித்தடங்களில் சாலை வழியாக 70 நிமிடங்கள் மட்டுமே ஆகும். அத்திப்பட்டுக்கு அப்பால், விரைவு ரயில்கள் கடந்து செல்வதற்காக புறநகர் ரயில்கள் அடிக்கடி நிலையங்களில் நிறுத்தப்படுகின்றன.
இந்தப் பிரிவுகளில் இரவு நேரங்களில் ரயில் சேவைகள் குறைக்கப்பட்டுள்ளதால் பெரும் சிரமம் ஏற்படுகிறது. கும்மிடிப்பூண்டி சிப்காட்டிற்கு நாளொன்றுக்கு 5,000க்கும் அதிகமானோர் பணிக்கு செல்கின்றனர். இவர்கள் சரியான நேரத்திற்கு செல்ல முடியவில்லை. ஒவ்வொரு ஆண்டும், கும்மிடிப்பூண்டி பிரிவு புறக்கணிக்கப்படுகிறது .சென்னை-கும்மிடிப்பூண்டி இடையே தினமும் 95 ஆயிரம் பயணிகள் பயணிக்கின்றனர். இவ்வாறு அவர்கள் தெரிவித்தனர்.
இது குறித்து சென்னை ரயில்வே கோட்ட அதிகாரி கூறியதாவது: அத்திப்பட்டு புதுநகரில் இருந்து கும்மிடிப்பூண்டி வரை மூன்றாவது மற்றும் நான்காவது ரயில் பாதை அமைப்பதற்கான இட ஆய்வு முடிந்து, ரயில்வே வாரியத்தின் ஒப்புதலுக்காக காத்திருக்கிறது.
ரயில்களின் சீரான இயக்கத்திற்கு இன்றியமையாத பராமரிப்பு வசதிக்காக ரத்து செய்யப்பட்டுள்ளது. சென்னை-அத்திப்பட்டு-கும்மிடிப்பூண்டி-கூடூர் பகுதி தெற்கு ரயில்வேயின் பரபரப்பான வழித்தடங்களில் ஒன்றாகும். புறநகர் மெமு ரயில்கள், எக்ஸ்பிரஸ் மற்றும் சரக்கு ரயில்கள் 24 மணி நேரமும் இயங்கும். இந்த வழித்தடத்தில் செல்லும் ரயில்கள் இரு திசைகளிலும் பச்சை சிக்னலுக்காக அடிக்கடி வந்து செல்கின்றன. மூன்றாவது மற்றும் நான்காவது பாதைகள் 2012 மற்றும் 2023க்கு இடையில் சென்னை சென்ட்ரலில் இருந்து கொருக்குப்பேட்டை முதல் அத்திப்பட்டு வரையிலான 21-கிமீ தூரத்தில் கட்டம் கட்டமாக அமைக்கப்பட்டாலும், இந்த கூடுதல் வழித்தடங்கள் முதன்மையாக சரக்கு ரயில்களுக்குப் பயன்படுத்தப்பட்டுள்ளன. தாமதம் மற்றும் அதிக நேரமாகும் சிக்கல்கள் தீர்க்கப்படும். இவ்வாறு அவர் தெரிவித்தார்.
The post சென்னை-கும்மிடிப்பூண்டி இடையே 3வது மற்றும் 4வது ரயில் பாதைக்கான இட ஆய்வு முடிந்தும் பணிகள் தாமதம்: வாரியத்தின் ஒப்புதலுக்கு காத்திருப்பதாக அதிகாரி தகவல் appeared first on Dinakaran.
