டிராக்டரில் ஏர் உழுதபோது விவசாய நிலத்தில் பதுக்கிய நாட்டு வெடிகுண்டுகள் சிக்கியது: ஒடுகத்தூர் அருகே பரபரப்பு

ஒடுகத்தூர்: விவசாய நிலத்தில் டிராக்டரில் ஏர் உழுதபோது அங்கு பதுக்கி வைத்திருந்த 4 நாட்டு வெடிகுண்டுகள் சிக்கியது. இதனை வெடிகுண்டு நிபுணர்கள் செயலிழக்க செய்தனர்.
வேலூர் மாவட்டம் ஒடுகத்தூர் அடுத்த மேலரசம்பட்டு கிராமத்தைச் சேர்ந்தவர்கள் பாஸ்கர், இந்திரகுமார். இவர்கள் அருகருகே உள்ள தங்களது விவசாய நிலத்தில் வீடு கட்டி வசித்து வருகின்றனர். பாஸ்கர் 2 நாய்களை வளர்த்து வந்தார். கடந்த 2 நாட்களுக்கு முன் பக்கத்து வீட்டுக்காரர் இந்திரகுமாரின் விவசாய நிலத்தில் வைத்திருந்த நாட்டு வெடிகுண்டுகளை கடித்ததில் 2 நாய்களும் பலியானது.

இதுகுறித்து பாஸ்கர் வேப்பங்குப்பம் போலீசில் புகார் அளித்தார். அதன்பேரில் இன்ஸ்பெக்டர் புனிதா தலைமையிலான போலீசார் மற்றும் தடயவியல் நிபுணர்கள் சம்பவ இடத்திற்கு சென்று அங்கிருந்த தடயங்களை சேகரித்தனர். இதுதொடர்பாக வழக்குப்பதிந்து விசாரணை நடத்தி வந்தனர். இந்நிலையில் அதே பகுதியில் நேற்று முன்தினம் சிவா என்பவர் தனது நிலத்தை டிராக்டர் மூலம் உழுது கொண்டிருந்தார். அப்போது, டிராக்டரில் ஏதோ ஒரு பொருள் தட்டுப்பட்டுள்ளது. இதனை கவனித்த சிவா டிராக்டரை நிறுத்திவிட்டு பார்த்தபோது அது நாட்டு வெடிகுண்டுகள் என தெரிய வந்தது. இதனால், அதிர்ச்சியடைந்த அவர், உடனே வேப்பங்குப்பம் போலீசார், வனத்துறையினர் மற்றும் தீயணைப்பு துறையினருக்கு தகவல் கொடுத்தார்.

அதன்பேரில் சம்பவ இடத்திற்கு வந்த போலீசார் மற்றும் வனத்துறையினர் சுற்றியுள்ள விவசாய நிலங்களில் வேறு ஏதேனும் நாட்டு வெடிகுண்டு உள்ளதா என தீவிரமாக சோதனை செய்தனர். அப்போது சாமிநாதன் என்பவரது நிலத்தில் 2 நாட்டு வெடிகுண்டும், புகழேந்தி என்பவரது நிலத்தில் ஒரு நாட்டு வெடிகுண்டும் கண்டுபிடிக்கப்பட்டது. வேலூரில் இருந்து வெடிகுண்டு நிபுணர்கள் வரவழைக்கப்பட்டு 4 நாட்டு வெடிகுண்டுகளையும் கைப்பற்றினர். பின்னர், அதனை செயலிழக்க செய்தனர். தொடர்ந்து, கைப்பற்றப்பட்ட 4 நாட்டு வெடிகுண்டுகளை குடியாத்தம் பகுதியில் உள்ள தனியாருக்கு சொந்தமான குடோனில் பத்திரமாக வைத்தனர்.

மேலும் இந்த நாட்டுவெடிகுண்டுகளை வைத்த நபர்கள் யார் என்பது குறித்து தீவிர விசாரணை நடத்தி வருகின்றனர். மேலும், விவசாய நிலங்களில் மரம் நபர்கள் நடமாட்டம் இருந்தால் தகவல் தெரிவிக்க வேண்டும் எனவும், விவசாயிகள் கவனமுடன் இருக்க வேண்டும் என போலீசார் தெரிவித்துள்ளனர். விவசாய நிலத்தில் அடுத்தடுத்து 4 நாட்டு வெடிகுண்டுகள் கைப்பற்றிய சம்பவம் அப்பகுதியில் பெரும் பரபரப்பை ஏற்படுத்தியது.

The post டிராக்டரில் ஏர் உழுதபோது விவசாய நிலத்தில் பதுக்கிய நாட்டு வெடிகுண்டுகள் சிக்கியது: ஒடுகத்தூர் அருகே பரபரப்பு appeared first on Dinakaran.