இந்தியாவே வியந்து பார்க்கும் வெற்றிக்கு வித்திட்ட முதல்வர் மு.க.ஸ்டாலினுக்கு கோவையில் நாளை பிரமாண்ட பாராட்டு விழா: லட்சக்கணக்கானோர் பங்கேற்கும் வகையில் சிறப்பான ஏற்பாடு

சென்னை: மக்களவை தேர்தலில் இந்தியாவே வியந்து பார்க்கும் வெற்றிக்கு வித்திட்ட முதல்வர் மு.க.ஸ்டாலினுக்கு பிரமாண்ட பாராட்டு விழா உள்பட திமுக முப்பெரும் விழா கோவையில் நாளை நடக்கிறது. இதில் லட்சக்கணக்கானோர் பங்கேற்கும் வகையில் சிறப்பான ஏற்பாடுகள் செய்யப்பட்டுள்ளன. மக்களவை தேர்தலில் தமிழ்நாடு, புதுச்சேரி உட்பட 40 தொகுதிகளையும் மொத்தமாக சுருட்டி அள்ளியிருக்கிறது திமுக கூட்டணி. எந்தவொரு வெற்றிக்கும் அடித்தளம் முக்கியம் என்றால், அதற்கேற்ப, 2019லேயே விதை போட்டது திமுக தலைமை. குறிப்பாக திமுகவின் கூட்டணியில் எந்த பிளவு இல்லாமல் அன்று முதலே நீடித்ததை சொல்லலாம். பாசிச பாஜவுக்கு எதிரான ஒற்றை சிந்தனையில் கூடியிருக்கும் இந்த கூட்டணியில் எந்த பிளவும் இல்லாமல் பார்த்து கொண்டது; கூட்டணி கட்சிகளுக்கு சரியான தொகுதிகளை ஒதுக்கியது என தேர்தல் வெற்றிக்கு முதல் அடித்தளத்தை அமைத்தது திமுக தலைமை.

அதன் தொடர்ச்சியாக, திமுகவில் வேட்பாளர் தேர்வு, பிரசார வியூகம் என்று சொல்லலாம். குறிப்பாக சீனியர் மற்றும் புதுமுக வேட்பாளர்கள் என்ற கலவையுடன் வேட்பாளர் தேர்வு இருந்தது. பிரசாரத்தை பொறுத்தவரை, மிக குறுகிய நாட்களே இருந்த நிலையில், இரண்டு வேட்பாளர்களுக்கு ஒரு அறிமுக கூட்டம் என்ற அடிப்படையில், மு.க.ஸ்டாலின் தலைமையில் 20 தேர்தல் பிரசார பொதுக்கூட்டங்களை வெற்றிகரமாக நடத்தினர். இதில் திமுக ஆட்சிக்கு வந்த பின்பு செயல்படுத்திய திட்டங்கள், புதிய வாக்குறுதிகள், ஒவ்வொரு கூட்டத்திலும் சம்பந்தப்பட்ட இரண்டு தொகுதிகளுக்கு செயல்படுத்தும் திட்டங்கள் என முதலமைச்சரின் பேச்சு அமைந்தது. இந்த கூட்டங்களுக்கு வலுசேர்க்கும் வகையில் அமைச்சர் உதயநிதி மற்றும் எம்பி கனிமொழி ஆகியோரது பிரசாரம் அமைந்தது. இதற்கும் அடித்தளம் இட்டவர் மு.க.ஸ்டாலினே.

திமுக போட்டியிடும் தொகுதிகளில் தேர்தல் பணியில் காட்டும் அக்கறை, கூட்டணி கட்சிகள் போட்டியிடும் தொகுதியிலும் இருக்க வேண்டும் என்ற வகையில் அவரது கட்டளை அமைந்து இதற்காக ஒவ்வொரு தொகுதிக்கும் பொறுப்பாளர்களை நியமித்ததுடன், எந்த தொகுதியிலாவது தோல்வியை சந்திக்க நேரிட்டால், சம்பந்தப்பட்ட மாவட்ட செயலாளர் பதவியை இழக்க நேரிடும் எனவும் எச்சரித்து இருந்தார். இதன் காரணமாக, 40 தொகுதிகளிலும் திமுகவே போட்டியிடுவது போல, திமுகவினர் தேர்தல் பணியில் சுறுசுறுப்பாகினர். மிக முக்கியமாக களத்தில் திமுக மற்றும் கூட்டணி கட்சியினர் ஒருங்கிணைந்து செயல்பட்டனர். தேர்தலில் முடிவில் கூட்டணி கட்சியின் வேட்பாளர்கள் பலர் பல லட்சம் வாக்கு வித்தியாசத்தில் வெற்றி பெற்று இருப்பதே இதற்கு சாட்சி.

நாடாளுமன்றத் தேர்தலில் நாற்பதுக்கு நாற்பது என்ற வெற்றியைப் பெற்று, நூற்றாண்டின் நாயகர் கலைஞரின் காலடியில் காணிக்கை ஆக்குவோம் என்று மு.க.ஸ்டாலின் உறுதியேற்றார். அந்த உறுதியைச் செயல்படுத்திக் காட்டி விட்டார். இந்தியாவே வியந்து பார்க்கும் இந்த வெற்றிக்கு வித்திட்ட திமுக தலைவர்- தமிழ்நாடு முதல்வர் மு.க.ஸ்டாலினுக்கு பாராட்டு விழா- கருணாநிதி நூற்றாண்டு நிறைவு விழா, 40 தொகுதிகளிலும் திமுக கூட்டணிக்கு வெற்றி அளித்த மக்களுக்கு நன்றி தெரிவிக்கும் விழா என முப்பெரும் விழாவாக கோவை கொடிசியா மைதானத்தில் 15ம் தேதி (நாளை) நடக்கிறது. இவ்விழாவில் முதல்வர் மு.க.ஸ்டாலின் கலந்து கொண்டு சிறப்புரையாற்றுகிறார்.

இந்த முப்பெரும் விழாவுக்கான மேடையானது 40 அடி அகலத்தில், 150 அடி நீளத்தில் மிக பிரமாண்டமாக அமைக்கப்பட்டு வருகிறது. மேடையில் முதல்வர் உள்ளிட்ட முக்கிய பிரமுகர்கள் ஒரு பகுதியிலும், 40 எம்பிக்கள் ஒரு பகுதியிலும் அமரும் வகையில் ஏற்பாடுகள் செய்யப்பட்டுள்ளன. அமைச்சர்கள், திமுக நிர்வாகிகள், தொண்டர்கள் அமரும் வகையில் இருக்கைகள் அமைக்கப்பட்டு வருகிறது. இதுதவிர விழா நடைபெறும் இடத்தில் தொண்டர்களுக்கு தேவையான குடிநீர் வசதி, கழிப்பிட வசதி உள்ளிட்ட அனைத்து அடிப்படை வசதிகளும் செய்யப்பட உள்ளது.

தமிழகம் முழுவதும் இருந்து லட்சக்கணக்கான தொண்டர்கள் வருவார்கள் என்பதால் மாவட்ட வாரியாக பிரித்து, அவர்கள் தங்களுடைய வாகனங்களை நிறுத்துவற்கு வசதியாக 5 இடங்கள் தேர்வு செய்யப்பட்டுள்ளன. அங்கு வாகன நிறுத்தம் அமைக்கும் பணி நடந்து வருகிறது. விழாவை தொண்டர்கள் கண்டு ரசிப்பதற்கு வசதியாக மிக பிரமாண்ட எல்.இ.டி திரைகள் அமைக்கப்படுகின்றன. மிக முக்கியமாக களத்தில் திமுக மற்றும் கூட்டணி கட்சியினர் ஒருங்கிணைந்து செயல்பட்டனர். தேர்தல் முடிவில் கூட்டணி கட்சியின் வேட்பாளர்கள் பலர் பல லட்சம் வாக்கு வித்தியாசத்தில் வெற்றி பெற்று இருப்பதே இதற்கு சாட்சி.

The post இந்தியாவே வியந்து பார்க்கும் வெற்றிக்கு வித்திட்ட முதல்வர் மு.க.ஸ்டாலினுக்கு கோவையில் நாளை பிரமாண்ட பாராட்டு விழா: லட்சக்கணக்கானோர் பங்கேற்கும் வகையில் சிறப்பான ஏற்பாடு appeared first on Dinakaran.