கலைஞரின் நூற்றாண்டு நிறைவில் பெற்ற புது உத்வேகத்துடன் இந்தியா கூட்டணி வெற்றியை இன்று கொண்டாட எதிர்நோக்கியுள்ளோம்: முதல்வர் மு.க.ஸ்டாலின் அறிவிப்பு

சென்னை: கலைஞரின் நூற்றாண்டு நிறைவில் பெற்ற புது உத்வேகத்துடன் இன்று இந்தியா கூட்டணியின் வெற்றியை, இந்திய மக்களுக்கான வெற்றியைக் கொண்டாட எதிர் நோக்கியுள்ளோம் என்று முதல்வர் மு.க.ஸ்டாலின் கூறியுள்ளார். முன்னாள் முதல்வர் கலைஞரின் 101வது பிறந்தநாளை ஒட்டி, டெல்லியில் உள்ள திமுக அலுவலகத்தில் அவரது உருவப்படத்திற்கு காங்கிரஸ் தலைவர்கள் சோனியாகாந்தி, ராகுல் காந்தி மற்றும் இந்தியா கூட்டணி தலைவர்கள் மலர் தூவி மரியாதை செலுத்தினர்.

இந்த நிலையில், டெல்லியில் இந்தியா கூட்டணி தலைவர்கள் கருணாநிதிக்கு மரியாதை செலுத்தியதைக் குறிப்பிட்டு முதல்வர் மு.க.ஸ்டாலின் தனது எக்ஸ் தளத்தில் பதிவிட்டிருப்பதாவது: சோனியா காந்தி அம்மையார், எனது அன்புச் சகோதரர் ராகுல் காந்தி, பரூக் அப்துல்லா, சீதாராம் யெச்சூரி, டி.ராஜா உள்ளிட்ட இந்தியா கூட்டணிக் கட்சிகளின் தலைவர்கள் தலைநகர் டெல்லியில் ஒன்றுகூடி முத்தமிழறிஞர் கலைஞர் நூற்றாண்டு நிறைவில் இதயப்பூர்வமான மரியாதை செலுத்திய இந்நாளில், அவரை ஒரு மாநிலத் தலைவராக மட்டுமின்றி தேசிய அளவிலான தலைவராகப் போற்றி வணங்குகிறோம்!
கூட்டாட்சியியல் மற்றும் மக்களாட்சிக்காக தொடர்ந்து உறுதியாகக் குரல் கொடுத்த தலைவர் கலைஞர் தேசக் கட்டுமானத்தில் மிக முக்கியப் பங்காற்றியுள்ளார். நெருக்கடியான காலங்களில், ஒன்றிய அளவில் நிலையான ஆட்சி தொடர்வதை உறுதி செய்துள்ளார். பல பிரதமர்கள், குடியரசுத் தலைவர்களை முடிவு செய்வதில் முக்கியப் பங்கு வகித்து இந்தியாவின் அரசியல் நிலப்பரப்பை பக்குவமாக வடிவமைத்தவர் அவர். அவரது நூற்றாண்டு நிறைவில் பெற்ற புது உத்வேகத்துடன் இன்று நமது கூட்டணியின் வெற்றியை, இந்திய மக்களுக்கான வெற்றியைக் கொண்டாட எதிர்நோக்கியுள்ளோம். இவ்வாறு பதிவில் கூறப்பட்டுள்ளது.

The post கலைஞரின் நூற்றாண்டு நிறைவில் பெற்ற புது உத்வேகத்துடன் இந்தியா கூட்டணி வெற்றியை இன்று கொண்டாட எதிர்நோக்கியுள்ளோம்: முதல்வர் மு.க.ஸ்டாலின் அறிவிப்பு appeared first on Dinakaran.