ஜெயக்குமார் மரணம் தொடர்பாக நெல்லை கிழக்கு மாவட்ட காங்கிரஸ் அலுவலகத்தில் போலீசார் சோதனை..!!

நெல்லை: நெல்லை காங்கிரஸ் நிர்வாகி ஜெயக்குமார் மரணம் தொடர்பாக, நெல்லை கிழக்கு மாவட்ட காங்கிரஸ் அலுவலகத்தில் போலீசார் சோதனை நடத்தி வருகின்றனர். நெல்லை மாவட்டம் கரைச்சுத்துபுதூரில் ஜெயக்குமார் வீடு முன்பு இருக்கக்கூடிய அலுவலகத்தில் காவல்துறை ஆய்வாளர் தலைமையிலான அலுவலர்கள் சோதனையில் ஈடுபட்டுள்ளனர். ஜெயக்குமாரின் செல்போன் மாயமான நிலையில், போலீசார் அலுவலகத்தில் சோதனை நடத்தி வருகின்றனர். அலுவலகத்தில் உள்ள கோப்புகளை ஆய்வு செய்தனர். கடிதத்தில் குறிப்பிட்ட அரசியல் கட்சி நிர்வாகிகள், தொழிலதிபர்களிடம் நேரில் சென்று விசாரணை நடத்தி வருகின்றனர்.

ஜெயக்குமார் கடிதத்தில் குறிப்பிட்டுள்ள நபர்களிடமும் விசாரணை தீவிரப்படுத்தப்பட்டுள்ளது. கடிதத்தில் குறிப்பிடப்பட்டிருந்த முதல் நபரான ஆனந்தராஜின் தொலைபேசி எண் ஸ்விட்ச் ஆப் செய்யப்பட்டுள்ளது. முன்னாள் அரசு ஊழியர் குத்தாலிங்கம் மற்றும் தனியார் பள்ளி நிர்வாகி ஜெய்கர், தொழிலதிபர் ஜேசுராஜா ஆகியோரிடம் விசாரணை நடத்தப்படுகிறது. இதனிடையே, ஜெயக்குமார் தனசிங் மகனிடம் டிஎன்ஏ பரிசோதனை செய்ய குடும்பத்தினர் முடிவு செய்துள்ளனர்.

சடலமாக மீட்கப்பட்டது ஜெயக்குமார் தானா? என கண்டறிய டிஎன்ஏ சோதனை நடத்த குடும்பத்தினர் முடிவு செய்திருக்கின்றனர். ஜெயக்குமார் மரண வழக்கு தொடர்பாக முன்னாள் அமைச்சர் வீட்டில் காவல்துறையினர் விசாரணை நடத்தி வருகின்றனர். அதன்படி, பாளையங்கோட்டையில் உள்ள தனுஷ்கோடி ஆதித்தனார் வீட்டில் ஒரு மணி நேரத்திற்கும் மேலாக விசாரணை நடைபெற்று வருகிறது.

The post ஜெயக்குமார் மரணம் தொடர்பாக நெல்லை கிழக்கு மாவட்ட காங்கிரஸ் அலுவலகத்தில் போலீசார் சோதனை..!! appeared first on Dinakaran.