மும்பை: இந்திய கிரிக்கெட் அணியின் முன்னணி வீரர் விராட் கோஹ்லி. அண்மையில் சொந்த மண்ணில் இங்கிலாந்துக்கு எதிரான டெஸ்ட் தொடரில் அவர் ஆடவில்லை. கோஹ்லி-அனுஷ்கா சர்மா தம்பதியினருக்கு 2வதாக ஆண் குழந்தை பிறந்ததால் அவர் ஓய்வு எடுத்துக்கொண்டார். வரும் 22ம் தேதி தொடங்கும் ஐபிஎல் கோஹ்லி களம் இறங்குகிறார். விரைவில் அவர் அணிஆர்சிபி அணியில் இணைவார் என தெரிகிறது. இதனிடையே வரும் ஜூன் மாதம் வெஸ்ட்இண்டீஸ் மற்றும் அமெரிக்காவில் நடைபெற உள்ள ஐசிசி டி.20 உலக கோப்பை தொடரில் விராட் கோஹ்லிக்கு இந்திய அணியில் இடம் கிடைக்காது என தகவல் வெளியாகி இருக்கிறது.
வெஸ்ட் இண்டீஸ் ஆடுகளங்கள் மிகவும் மெதுவாக இருக்கும். எனவே நங்கூரமாக நின்று மெதுவாக விளையாடக்கூடிய கோஹ்லியின் அணுகுமுறை அங்கு பொருந்தாது என தேர்வு குழுவினர் கருதுவதாக செய்திகள் தெரிவிக்கின்றன. இந்த தகவல் ரசிகர்கள் மத்தியில் பெரும் அதிர்ச்சியை ஏற்படுத்தி உள்ளது.
இதனிடையே இங்கிலாந்து முன்னாள் வீரர் ஸ்டுவர்ட் பிராட், இந்தியா கழற்றிவிட நினைத்தாலும் உலகின் சூப்பர் ஸ்டார் வீரராக கருதப்படும் கோஹ்லியை, ஐசிசி விளையாட வைக்கும் என்று கூறியுள்ளார். இதுபற்றி அவர் எக்ஸ் தளத்தில், “இந்த செய்தி உண்மையாக இருக்க முடியாது. விளையாட்டை ரசிகர்களின் பார்வையில் வளர்ப்பதற்காக இந்தியா மற்றும் பாகிஸ்தான் மோதும் போட்டியை அமெரிக்காவின் நியூ யார்க் நகரில் ஐசிசி வைத்துள்ளது. அப்படிப்பட்ட சூழ்நிலையில் கோஹ்லி உலகில் எந்த வீரரையும் விட மகத்தானவர். எனவே அவர் கண்டிப்பாக அந்த உலகக் கோப்பையில் தேர்ந்தெடுக்கப்படுவார் என்று நான் நம்புகிறேன்” எனக் கூறினார்.
இதேபோல் பாகிஸ்தானின் முன்னாள் வேகப்பந்து வீச்சாளர் முகமது இர்பான், கோஹ்லி இல்லாமல் இந்திய அணியை உருவாக்க முடியாது. கடந்த ஆண்டு உலகக் கோப்பையில் அவர் என்ன செய்தார் என்பதை நாங்கள் அனைவரும் பார்த்தோம். அவர் இந்தியாவுக்காக 3-4 போட்டிகளில் தனியாக நின்றுஆடி வெற்றியை தேடித்தந்தார். அவர் டி20 உலகக் கோப்பை அணியில் அவசியம். ஏனெனில் அவரால் தனிநபராக போட்டிகளை வெல்ல முடியும். டி20 உலகக் கோப்பையில் அவரின் இடத்தைப் பற்றி கேள்வி கேட்பவர்கள் கல்லி கிரிக்கெட்டைச் சேர்ந்தவர்கள், என சாடி உள்ளார்.
The post டி20 உலக கோப்பையில் விராட் கோஹ்லி நீக்கமா?: முன்னாள் வீரர்கள் காட்டம் appeared first on Dinakaran.
