கூட்டணி முறிந்த நிலையில் போஸ்டர் யுத்தம் புலிக்கு புலிகேசி ஆதரவு எதற்கு? – பாஜ பிஜேபி தமிழகத்துக்கு ஆகாது – அதிமுக

மதுரை: புலிகேசியின் ஆதரவு புலிக்கு எதற்கு என பாஜவினரும், பாஜவை வெளியேற்றியதால் செப்டம்பரிலேயே வந்த தீபாவளி என அதிமுகவினரும் மதுரையில் மாறி மாறி போஸ்டர்கள் ஒட்டுவதால் பரபரப்பு ஏற்பட்டுள்ளது. தேஜ கூட்டணியில் இருந்து அதிமுக வெளியேறுவதாகவும், இனி எந்த காலகட்டத்திலும் பாஜவுடன் கூட்டணி கிடையாது எனவும் அதிமுக அறிவித்துள்ளது. இந்த அறிவிப்புக்கு தமிழகத்தின் பல்வேறு பகுதிகளில் அதிமுக, பாஜ கட்சியினர் மாறி, மாறி பட்டாசுகள் வெடித்தும், இனிப்புகள் வழங்கியும் மகிழ்ச்சியை வெளிப்படுத்தி வருகின்றனர். மதுரையில் பாஜ சார்பில் மாவட்ட பொதுச்செயலாளர் ராஜ்குமார் ஒட்டியுள்ள போஸ்டர்களில், ‘‘போர்க்குணம் கொண்ட காவி படைகள் இருக்க! சனாதனம் தாங்கி பிடிக்க மக்கள் இருக்க! புலிகள் போல் தலைவர்கள் இருக்க! புலிகேசியின் ஆதரவு எதற்கு? போட்றா வெடிய…’’ என்ற வசனங்களுடன் அச்சிடப்பட்ட போஸ்டர்களை மதுரை மாநகர் முழுவதிலும் அண்ணாமலை, மோடி படங்களுடன் அச்சிட்டு ஒட்டியுள்ளனர்.

இதேபோல், அதிமுக சார்பில் ஒட்டப்பட்டுள்ள போஸ்டர்களில், ‘‘நவம்பரில்தான் தீபாவளி என்று நினைத்தோம். பாஜவை வெளியேற்றி செப்டம்பரிலேயே தீபாவளியை கொண்டாட வைத்த பொதுச் செயலாளர் எடப்பாடியாருக்கு நன்றி.. நன்றி…’’ என்ற வார்த்தைகள் இடம் பெற்றுள்ளன. மதுரையில், ‘கிங் மேக்கர் – புரட்சி தமிழர்’ என எடப்பாடி பழனிசாமி படத்துடன் அதிமுகவினரால் ஒட்டப்பட்ட போஸ்டர்களின் அருகிலேயே, பாஜவினர் புலிகேசி என்று அச்சிட்ட போஸ்டர்களை தேடித்தேடி ஒட்டியுள்ளனர்.

தூத்துக்குடி: முன்னாள் அமைச்சர் காளிமுத்து கருவாடு மீனாகாது, கறந்த பால் மடி புகாது என்று அடிக்கடி கூறுவது வழக்கம். அதே சொற்றொடரை பயன்படுத்தி பாஜ கூட்டணி முறிவை, ‘கருவாடு மீன் ஆகாது, பிஜேபி தமிழகத்துக்கு ஆகாது…’’ என்று தூத்துக்குடி தெற்கு மாவட்ட அதிமுக எம்ஜிஆர் இளைஞரணி நிர்வாகிகள் தூத்துக்குடியில் போஸ்டர்களை ஒட்டியுள்ளனர். இவர்கள் தான் கடந்த வாரம், ‘‘கூட்டணியாவது கூந்தலாவது’ நன்றி மீண்டும் வராதீர்கள்.’’ என்று போஸ்டர் ஒட்டியிருந்தனர். பாஜ சார்பிலும் போஸ்டர்கள் ஒட்டப்பட்டுள்ளன.

நோட்டாவின் போட்டியாளருக்கு டாட்டா
பாஜவுடன் கூட்டணி முறிந்ததையடுத்து ‘‘நோட்டாவின் போட்டியாளர்களுக்கு டாட்டா காட்டிய கழக நிரந்தரப் பொதுச் செயலாளர் எடப்பாடியார்.’’ என்று தெற்கு மாவட்ட அதிமுக செயலாளர் எஸ்.பி.சண்முகநாதன் பெயரில் போஸ்டர்கள் ஒட்டப்பட்டுள்ளன. இந்த போஸ்டர் மற்றும் கூட்டணி முறிவு தொடர்பாக மீம்ஸ் சமூக வலைதளங்களில் வைரலாகி வருகிறது.

‘எங்களுக்கு தீபாவளி… எடப்பாடிக்கு வயித்து வலி’
அதிமுக – பாஜ கூட்டணி முறிவை தொடர்ந்து மதுரையில் பாஜவினர் பட்டாசு கொளுத்தி கொண்டாடினர். அப்போது, கைகளில் கம்பி மத்தாப்புகளை கொளுத்தியபடி, ‘எங்களுக்கு தீபாவளி.. எடப்பாடிக்கு வயித்து வலி’ என்று கோஷங்களை எழுப்பினர். இந்த வீடியோ காட்சி சமூக வலைத்தளங்களில் வைரலாகி வருகிறது.

The post கூட்டணி முறிந்த நிலையில் போஸ்டர் யுத்தம் புலிக்கு புலிகேசி ஆதரவு எதற்கு? – பாஜ பிஜேபி தமிழகத்துக்கு ஆகாது – அதிமுக appeared first on Dinakaran.