சென்னை: சென்னை விமான நிலையத்தில் மல்டி லெவல் பார்க்கிங்கில் வாகனங்களை நிறுத்தாமல், விமான நிலைய வளாகத்துக்குள் விதிமீறி நிறுத்தப்படும் வாகனங்கள் பறிமுதல் செய்யப்பட்டு, அபராதம் விதிக்கும் நடைமுறை செயல்பாட்டுக்கு வந்துள்ளது.
சென்னை விமான நிலையத்தில் ₹250 கோடியில், 2.5 லட்சம் சதுர அடி பரப்பில், 6 அடுக்கு மல்டி லெவல் பார்க்கிங் அமைக்கப்பட்டுள்ளது. விமான நிலைய வளாகத்தில் போக்குவரத்து நெரிசலை குறைக்க, அனைத்து வகை வாகனங்களும் மல்டி லெவல் கார் பார்க்கிங்கில் மட்டும் தான் நிறுத்தப்பட வேண்டும். அதைமீறி வெளியில் நிறுத்தினால் நடவடிக்கை எடுக்கப்படும், என விமான நிலைய நிர்வாகம் அறிவித்தது. ஆனால், பயணிகள் மற்றும் பயணிகளை வழியனுப்ப, வரவேற்க வருபவர்கள் பலர் தங்கள் வாகனங்களை மல்டி லெவல் கார் பார்க்கிங்கில் நிறுத்தாமல், சென்னை விமான நிலைய வருகை பகுதி, புறப்பாடு பகுதிகளில் ஆங்காங்கே வெளியில் நிறுத்தி வந்தனர். இதனால் விமான நிலையத்தில் கடும் போக்குவரத்து நெரிசல் ஏற்பட்டு வந்தது.
இதனால் பார்க்கிங்கில் நிறுத்தாமல், விமான நிலைய வளாகத்திற்குள் அத்துமீறி நிறுத்தப்படும் வாகனங்களை பறிமுதல் செய்து, அபராதம் விதிக்கும் நடவடிக்கையை சென்னை விமான நிலையம் தொடங்கியுள்ளது. இதற்காக தனியார் ஒப்பந்த நிறுவனத்தை பணிக்கு அமர்த்தியுள்ளனர். இவர்கள், விதிமீறி நிறுத்தப்படும் வாகனங்களை பறிமுதல் செய்து, இருசக்கர வாகனங்களுக்கு ₹100, கார்களுக்கு ₹500 அபராதம் விதிக்கின்றனர். அந்த அபராத தொகையை செலுத்திய பின்பு வாகனம் விடுவிக்கப்படுகிறது.
6 அடுக்கு மல்டி லெவல் பார்க்கிங் பகுதியில் நிறுத்தப்படும் இருசக்கர வாகனங்களுக்கு, குறைந்தபட்ச கட்டணம் ₹20ம், அதிகபட்சமாக 24 மணி நேரத்திற்கு ₹90 வசூலிக்கப்படுகிறது. அதைப்போல் கார்களுக்கு குறைந்தபட்ச கட்டணம் ₹75ம், 24 மணி நேரத்திற்கு அதிகபட்ச கட்டணம் ₹500 வசூலிக்கப்படுகிறது. ஆனால் முறையாக பார்க்கிங்கில் நிறுத்தாமல், போக்குவரத்துக்கு இடையூறாக நிறுத்தப்படும் வாகனங்கள் பறிமுதல் செய்யப்பட்டு, பார்க்கிங் கட்டணத்தை விட பல மடங்கு அதிக கட்டணம் அபராதமாக வசூலிக்கப்படுவது, சென்னை விமான நிலையத்தில் பரபரப்பை ஏற்படுத்தி உள்ளது.
The post மல்டி லெவல் பார்க்கிங் பகுதியில் நிறுத்தாமல் விமான நிலைய வளாகத்தில் விதிமீறி நிறுத்தும் வாகனங்களுக்கு அபராதம்: நிர்வாகம் அதிரடி appeared first on Dinakaran.
