கொச்சி: ஒருவரது தனிப்பட்ட நேரத்தில் ஆபாசப் புகைப்படங்கள் அல்லது வீடியோக்களை மற்றவர்களுக்குக் காட்டாமல் பார்ப்பது சட்டப்படி குற்றமாகாது, அது தனிப்பட்ட விருப்பம் என கேரள உயர்நீதிமன்றம் தெரிவித்துள்ளது.
கேரளாவில் கடந்த 2016ம் ஆண்டு சாலையோரத்தில் மொபைல் போனில் ஆபாச வீடியோக்களை பார்த்துக் கொண்டிருந்த 33 வயது நபர் மீது இந்திய தண்டனைச் சட்டம் 292வது பிரிவின் கீழ் ஆபாசமாக நடந்து கொண்டதாக தொடரப்பட்ட வழக்கு தொடரப்பட்டது. இந்த வழக்கை ரத்து செய்யக்கேட்டு கேரள உயர் நீதிமன்றத்தில் அவர் மனுத்தாக்கல் செய்தார். இந்த மனுவை விசாரித்த நீதிபதி பி.வி.குன்ஹிகிருஷ்ணன் மனுதாரர் மீதான வழக்கை ரத்து செய்து தீர்ப்பை வழங்கினார்.
அப்போது அவர் கூறியதாவது: ஆபாசப் படங்கள் பல நூற்றாண்டுகளாக நடைமுறையில் உள்ளன. புதிய டிஜிட்டல் யுகம் குழந்தைகளுக்கும் கூட அதை அணுகக்கூடியதாக மாற்றியுள்ளது. அப்படி இருக்கையில் ஒரு நபர் தனது தனிப்பட்ட நேரத்தில் ஒரு ஆபாச வீடியோவை மற்றவர்களுக்குக் காட்டாமல் பார்ப்பது குற்றமாகும் என்று ஒரு நீதிமன்றத்தால் அறிவிக்க முடியாது. அவரது தனிப்பட்ட விருப்பமும், அதே அளவு குறுக்கீடும் அவரது தனியுரிமையில் ஊடுருவலாகும். மனுதாரர் (குற்றம் சாட்டப்பட்டவர்) வீடியோவை பகிரங்கமாக காட்சிப்படுத்தியதாக எந்த குற்றச்சாட்டும் இல்லை.
ஒருவர் தனியாக ஆபாசமான புகைப்படத்தைப் பார்ப்பது ஐபிசியின் 292 (ஆபாசம்) பிரிவின் கீழ் குற்றமாகாது என்று நான் கருதுகிறேன். அதேபோல், ஒரு நபர் தனது தனியுரிமையில் மொபைல் போனில் இருந்து ஆபாசமான வீடியோவைப் பார்ப்பது பிரிவு 292 ஐபிசியின் கீழ் குற்றம் அல்ல. குற்றம் சாட்டப்பட்டவர் ஏதேனும் ஆபாசமான வீடியோ அல்லது புகைப்படங்களை பரப்பவோ அல்லது பகிரங்கமாக காட்சிப்படுத்தவோ முயன்றால், ஐபிசி 292 பிரிவின் கீழ் குற்றமாகும். எனவே, குற்றம் சாட்டப்பட்டவர்களுக்கு எதிராக ஐபிசி பிரிவு 292ன் கீழ் எந்த குற்றமும் இல்லை. மேலும் இந்த வழக்கு தொடர்பாக மாஜிஸ்திரேட் நீதிமன்றத்தில் நடந்த அனைத்து நடவடிக்கைகளும் ரத்து செய்யப்படுகிறது என்று தீர்ப்பளித்தார்.
* பெற்றோருக்கு அட்வைஸ்
நீதிபதி குன்ஹிகிருஷ்ணன் மேலும் தனது உத்தரவில் கூறுகையில்,’ குழந்தைகளை மகிழ்விப்பதற்காக இணைய வசதியுடன் கூடிய மொபைல் போன்களை வழங்கக்கூடாது.இதன் பின்னணியில் உள்ள ஆபத்து குறித்து பெற்றோர்கள் விழிப்புடன் இருக்க வேண்டும். குழந்தைகள் தங்கள் பெற்றோரின் மொபைல் போன்களில் இருந்து தகவல் தரும் செய்திகளையும் வீடியோக்களையும் அவர்கள் முன்னிலையில் பார்க்கட்டும். பெற்றோர்கள் மைனர் குழந்தைகளை மகிழ்விப்பதற்காக ஒருபோதும் மொபைல் போன்களை ஒப்படைக்கக்கூடாது.
இப்போது அனைத்து மொபைல் போன்களிலும் அணுகக்கூடிய ஆபாச வீடியோக்களை மைனர் குழந்தைகள் பார்க்க முடிந்தால், எதிர்காலத்தில் பாதிப்புகள் ஏற்படும். குழந்தைகள் விளையாட்டுகளை விளையாட அனுமதிக்க வேண்டும். ‘‘ஸ்விக்கி’ மற்றும் ‘ஜோமாடோ’ மூலம் உணவகங்களில் உணவு வாங்குவதற்குப் பதிலாக, குழந்தைகளின் அம்மா செய்யும் சுவையான உணவை வழங்க வேண்டும். மேலும் குழந்தைகளை விளையாட்டு மைதானங்களில் விளையாடிவிட்டு, தாயின் உணவின் மயக்கும் வாசனையுடன் வீடு திரும்பட்டும். அதை இந்த சமுதாயத்தின் மைனர் குழந்தைகளின் பெற்றோரின் அறிவுக்கு விட்டுவிடுகிறேன்’ என்று நீதிபதி கூறினார்.
The post மற்றவர்களுக்குக் காட்டாமல் தனிமையில் ஆபாச படம் பார்ப்பது குற்றமல்ல: கேரள உயர்நீதிமன்றம் கருத்து appeared first on Dinakaran.
