சேத்துப்பட்டு, ஆக. 23: சேத்துப்பட்டு மார்க்கெட் கமிட்டியில் உள்ள 6 குடோன்களில் 20 ஆயிரம் நெல் மூட்டைகள் விற்பனைக்கு குவிந்துள்ளது. எனவே வரும் 28ம் தேதி வரை மூட்டைகளை கொண்டுவர வேண்டாம் என கண்காணிப்பாளர் அறிவித்துள்ளார். திருவண்ணாமலை மாவட்டம் சேத்துப்பட்டு மார்க்கெட் கமிட்டி நெல் கொள்முதல் செய்வதில் மாநிலத்தில் இரண்டாவது இடத்திலும் மாவட்டத்தில் முதல் இடத்திலும் திகழ்ந்து வருகிறது. இங்கு விவசாயிகளின் விளை பொருளுக்கு நல்ல விலை கிடைப்பதால் பக்கத்து மாவட்டங்களான விழுப்புரம், காஞ்சிபுரம், செங்கல்பட்டு, ஆற்காடு ஆகிய பகுதிகளை சேர்ந்த விவசாயிகள் தங்கள் விளை பொருட்களை விற்பனைக்கு கொண்டு வருகின்றனர்.
விவசாயிகளின் விளை பொருட்களுக்கு உடனுக்குடன் கணினி முறையில் பதிவேற்றம் செய்து வங்கிகள் மூலம் பணம் செலுத்தப்படுவதால் விவசாயிகள் பெரிதும் மகிழ்ச்சி அடைகின்றனர். இந்நிலையில் தற்போது கார் பருவம் ஆர்என்ஆர்நெல் வரத்து அதிகமாக உள்ளது குறைந்தபட்சமாக ₹1459 அதிகபட்சமாக ₹2121, கோ 51 நெல் குறைந்தபட்சம் ₹1100 அதிகபட்சம் ₹1650 விலை போகிறது. மார்க்கெட் கமிட்டியில் தினமும் விவசாயிகளின் நெல் மூட்டைகள் 5000 முதல் 6000 மூட்டைகள் வரை கொள்முதல் செய்யப்பட்டு வருகிறது. தற்போது சேத்துப்பட்டு மார்க்கெட் கமிட்டியில் உள்ள 6 நெல் குடோன்களில் 20 ஆயிரம் நெல் மூட்டைகள் குவிந்துள்ளது. இந்த நெல் மூட்டைகள் எடை போடாமலும், விலை போடாமலும் உள்ளது.நேற்று மட்டும் 142 விவசாயிகளின் 4500 மூட்டைகள் கொள்முதல் செய்யப்பட்டுள்ளது.
வந்தவாசியில் 135 விவசாயிகளில் 4000 நெல் மூட்டைகளும், போளூரில் 174 விவசாயிகளின் 6500 நெல் மூட்டைகளும், 125 விவசாயிகளின் 3800 நெல் மூட்டைகளும், செய்யாறில் 155 விவசாயிகளின் 4000 நெல் மூட்டைகள், தேசூரில் 76 விவசாயிகளின் 1900 நெல் மூட்டைகள் கொள்முதல் செய்யப்பட்டுள்ளது. சேத்துப்பட்டு மார்க்கெட் கமிட்டியில் குடோன்கள் நிரம்பி வழிவதால் வரும் 28ஆம் தேதி வரை விவசாயிகள் நெல் மூட்டைகளை விற்பனைக்கு கொண்டு வர வேண்டாம் மார்க்கெட் கமிட்டி கண்காணிப்பாளர் தினேஷ் தெரிவித்துள்ளார்.
The post சேத்துப்பட்டு மார்க்கெட் கமிட்டியில் 6 குடோன்களில் விற்பனைக்கு குவிந்த 20 ஆயிரம் நெல் மூட்டைகள்: 28ம் தேதி வரை கொண்டு வர வேண்டாம் என அறிவிப்பு appeared first on Dinakaran.
