குஜராத் கடலை நோக்கி வரும் பிபோர்ஜோய் தீவிர புயல் காரணமாக மும்பையில் விமான சேவை பாதிப்பு..!!

மும்பை: குஜராத் கடலை நோக்கி வரும் பிபோர்ஜோய் தீவிர புயல் காரணமாக மும்பையில் விமான சேவை பாதிக்கப்பட்டுள்ளது. மோசமான வானிலை மற்றும் மும்பை விமான நிலையத்தில் ஓடுபாதை தற்காலிகமாக மூடப்பட்டதால் விமானங்கள் பல தாமதங்கள் மற்றும் ரத்து செய்யப்பட்டதாக ஏர் இந்தியா தெரிவித்துள்ளது. பிபோர்ஜோய் புயல் தீவிர சூறாவளி புயலாக மாறியதைத் தொடர்ந்து மும்பையில் கனமழை பெய்து வருவதால் ஏர் இந்தியா ட்விட்டரில் வெளியிட்டுள்ள அறிக்கையில், “மோசமான வானிலை மற்றும் மும்பை விமான நிலையத்தில் ஓடுபாதை தற்காலிகமாக மூடப்பட்டதால், எங்கள் கட்டுப்பாட்டிற்கு அப்பாற்பட்ட பிற காரணங்களால் எங்கள் சில விமானங்கள் தாமதம் மற்றும் ரத்து செய்யப்பட்டுள்ளன.

இடையூறுகளைக் குறைக்க எல்லா முயற்சிகளையும் மேற்கொள்வதாகவும் தெரிவித்துள்ளது. மும்பை மற்றும் மகாராஷ்டிராவின் பல்வேறு பகுதிகளில் ஞாயிற்றுக்கிழமை இரவு மழை பெய்தது. சூறாவளியின் தீவிரம் அதிகரித்ததால், மும்பை நகரம் மற்றும் மாநிலத்தின் கடலோரப் பகுதிகள் பலத்த காற்று மற்றும் அதனுடன் கூடிய மழையை எதிர்கொண்டன. தூசித் துகள்கள் இருப்பதால் காற்றின் தரம் மற்றும் தெரிவுநிலையையும் பலத்த காற்று பாதித்தது. காற்று பலமாக வீசுவதால் மும்பையில் இருந்து வெளியூருக்கு செல்ல இருந்த பல ஏர் இந்தியா விமானங்கள் ரத்து செய்யப்பட்டுள்ளது. மும்பையில் மட்டுமல்ல அதனை ஒட்டியுள்ள கிராமங்களிலும் பலத்த காற்று வீசிவருகிறது. மராட்டிய கடலோரம் பலத்த காற்று வீசுவதால் எங்கும் புழுதி படலமாக காணப்படுகிறது.

The post குஜராத் கடலை நோக்கி வரும் பிபோர்ஜோய் தீவிர புயல் காரணமாக மும்பையில் விமான சேவை பாதிப்பு..!! appeared first on Dinakaran.