சென்னை: சென்னை விமான நிலைய இயக்குனர் சரத்குமார் திடீரென டெல்லிக்கு இடமாற்றம் செய்யப்பட்டுள்ளார். சென்னை விமான நிலைய இயக்குனராக சரத்குமார் இருந்தார். இவர், ஏற்கனவே சென்னை ஒருங்கிணைந்த புதிய விமான நிலைய கட்டுமானத்துறையின் தலைமை அதிகாரியாக பணியாற்றினார். அதன் பின்பு கடந்த 2 ஆண்டுகளுக்கு முன்பு, சென்னை விமான நிலைய இயக்குனராக நியமிக்கப்பட்டார். இந்த நிலையில் இவருடைய சென்னை விமான நிலைய இயக்குனர் பதவிக்காலம் கடந்த ஜனவரி மாதமே நிறைவடைந்தது. இதையடுத்து சரத்குமார், டெல்லியில் உள்ள தலைமையகத்திற்கு, அனைத்து விமான நிலையங்களின் விமானங்கள் இயக்கம் (ஆபரேஷன்) துறைக்கு உறுப்பினராக நியமிக்கப்பட்டார். ஆனால் சென்னையில் கட்டப்பட்டு வந்த ஒருங்கிணைந்த புதிய விமான முனையம், திறப்பு விழா வரையில் அவர் சென்னையிலேயே பணியில் இருக்க அனுமதிகேட்டார். அதன்படி சென்னை விமான நிலைய இயக்குனராக சரத்குமார் தொடர்ந்தார். இதற்கிடையே கடந்த மாதம் சென்னை விமான நிலைய புதிய முனையம் திறப்புவிழா நடந்து புதிய விமான சேவைகள் தொடங்கியுள்ளன.
இதையடுத்து சென்னை விமான நிலைய இயக்குனராக இருந்த சரத்குமார், அந்த பொறுப்பில் இருந்து விடுவிக்கப்பட்டு, டெல்லி தலைமையகத்தில் உள்ள இந்திய விமானங்கள் இயக்கம் ஆபரேஷன் பிரிவு உறுப்பினர் பதவியை ஏற்கும்படி, இந்திய அபாயின்மென்ட் கமிட்டி, கடந்த 29ம் தேதி உத்தரவிட்டது. அதன்படி சென்னை விமான நிலைய இயக்குனராக இருந்த சரத்குமார், தனது பொறுப்புகளை சென்னை விமான நிலைய பொதுமேலாளர் (விமானங்கள் இயக்கம்) எஸ்.எஸ்.ராஜுவிடம் ஒப்படைத்துவிட்டு, டெல்லி புறப்பட்டு சென்றார். சென்னை விமான நிலையத்திற்கு புதிய இயக்குனர் நியமிக்கப்படும் வரை, சென்னை விமான நிலைய இயக்குனர் பொறுப்பை, பொது மேலாளர் எஸ்.எஸ்.ராஜு கவனிப்பார் என்று சென்னை விமான நிலைய அதிகாரிகள் தெரிவித்தனர்.
The post சென்னை விமான நிலைய இயக்குனர் திடீர் இடமாற்றம் appeared first on Dinakaran.
