கிருஷ்ணகிரி, ஏப்.14: கிருஷ்ணகிரி அருகே, கால பைரவர் கோயில்களில் தேய்பிறை அஷ்டமியையொட்டி சிறப்பு பூஜைகள் நடந்தது. கிருஷ்ணகிரி அருகே கல்லுக்குறிக்கி பெரியஏரி மேற்கு கோடியில் உள்ள காலபைரவர் கோயிலில், நேற்று தேய்பிறை அஷ்டமியையொட்டி சிறப்பு பூஜைகள் நடந்தது. காலை 7 மணிக்கு கணபதி ஹோமம், அஸ்டதிக்பதி ஹோமம், நவகிரக ஹோமம், மஹாலட்சுமி ஹோமம், காலபைரவ மஹா ஹோமம், பூர்ணாஹூதி, சிறப்பு அபிஷேகம், தீபாராதனை நடந்தது. வெள்ளிக் கவச அலங்காரத்தில் காலபைரவர் அருள்பாலித்தார். பகல் 12 மணிக்கு, காலபைரவர் உற்சவம், பரணி தீபம் ஏற்றும் நிகழ்ச்சி நடந்தது. இதில், ஏராளமான பெண்கள் பங்கேற்று பூசணி மற்றும் தேங்காயில் விளக்கேற்றி, தங்களது நேர்த்திக் கடன் செலுத்தினர். இதில், ஆயிரக்கணக்கான பக்தர்கள் பங்கேற்றனர். இதற்கான ஏற்பாடுகளை, 165 கிராமங்களைச் சேர்ந்த நிர்வாகிகள் மற்றும் கிராம மக்கள் செய்திருந்தனர். அனைவருக்கும் அன்னதானம் வழங்கப்பட்டது. இதே போல், கந்திகுப்பம் காலபைரவர் கோயில் மற்றும் சூரன்குட்டை தட்சிண கால பைரவர் கோயிலிலும், தேய்பிறை அஷ்டமியையொட்டி சிறப்பு பூஜைகள் மற்றும் வழிபாடுகள் நடந்தன. இதில், பல்வேறு பகுதிகளில் இருந்து ஏராளமான பக்தர்கள் பங்கேற்றனர்.
The post கால பைரவருக்கு சிறப்பு பூஜைகள் appeared first on Dinakaran.
