ஈரோடு: தமிழக ஆளுநரின் ஜனநாயக விரோத போக்கை கண்டித்து போராட்டம் நடத்த இந்திய கம்யூனிஸ்ட் கட்சி முடிவு செய்துள்ளது.  இந்திய கம்யூனிஸ்ட் கட்சியின் தெற்கு மாவட்ட குழு கூட்டம் ஈரோட்டில் நடைபெற்றது. இக்கூட்டத்திற்கு மாவட்ட துணை செயலாளர் சின்னசாமி தலைமை தாங்கினார். மாநில துணை செயலாளர் பெரியசாமி, மாவட்ட செயலாளர் பிரபாகரன், மாநில துணை தலைவர் துளசிமணி, பிரபு ஆகியோர் முன்னிலை வகித்தனர். கூட்டத்தில் நிறைவேற்றப்பட்ட தீர்மானங்கள்:  தமிழ்நாடு சட்டமன்றத்தில் நிறைவேற்றப்பட்ட ஆன்லைன் சூதாட்ட தடை சட்ட மசோதாவுக்கு ஒப்புதல் அளிக்காமல் காலம் தாழ்த்தியும், பல மாதங்களுக்கு பிறகு மசோதாவை திருப்பி அனுப்பிய தமிழக ஆளுநரின் ஜனநாயக விரோத போக்கை கண்டிப்பதோடு மட்டுமல்லாது, மாநில உரிமைகள் காக்கவும், அதற்கு தடையாக உள்ள ஆளுநரை கண்டித்தும் வருகின்ற 13ம் தேதி காலை 10 மணிக்கு ஈரோடு சூரம்பட்டி நால்ரோட்டில் ஆர்ப்பாட்டம் நடத்தப்படும்.

விசைத்தறியாளர்களுக்கு இலவச மின்சாரம் 750 யூனிட்டில் இருந்து 1,000 யூனிட்டாக உயர்த்தியதற்கும், கைத்தறி நெசவாளர்களுக்கு இலவச மின்சாரம் 200 யூனிட்டில் இருந்து 300 யூனிட்டாக உயர்த்திய தமிழ்நாடு அரசுக்கு நன்றி தெரிவிப்பது, காஸ் விலையை உயர்த்திய ஒன்றிய பாஜ அரசை கண்டிப்பதோடு, விலையை உடனடியாக குறைக்க கேட்டுக்கொள்வது, சேலம்  கொச்சி தேசிய நெடுஞ்சாலை, பெருந்துறை புறவழிச்சாலையில் விபத்துக்களை தவிர்க்க தேவையான இடங்களில் மேம்பாலம் சர்வீஸ் சாலைகள் அமைக்க வேண்டும். பெருந்துறை தாலுகாவில் இருந்து சென்னிமலையை பிரித்து தனி தாலுகாவாக செயல்படுத்தவது. சிப்காட் தொழிற்சாலையில் நிலத்தடி நீர் மாசுபட்டுள்ளதால், அப்பகுதி மக்களுக்கு பாதுகாக்கப்பட்ட குடிநீர் வழங்க வேண்டும் உள்ளிட்ட பல்வேறு தீர்மானங்கள் நிறைவேற்றப்பட்டன.

இந்திய கம்யூனிஸ்ட் முடிவு