மேற்கூரை பழுதடைந்த அங்கன்வாடி மையம்கலெக்டரிடம் புகார் மனு

போச்சம்பள்ளி, பிப்.22:கிருஷ்ணகிரி கேஆர்பி உபரிநீர் நீடிப்பு இடதுபுற கால்வாய் பயன் பெறுவோர் சங்க தலைவர் சிவகுரு, கலெக்டர் ஜெயசந்திரபானு ரெட்டியிடம் அளித்த மனுவில் கூறியிருப்பதாவது: காவேரிப்பட்டணம் ஒன்றியம், மாரிச்செட்டிஅள்ளி கிராமத்தில் அங்கன்வாடி மையம் உள்ளது. இதில் ஏராளமான குழந்தைகள் படித்து வருகின்றனர். இந்த அங்கன்வாடி மைய கட்டிடம் பழுதடைந்த நிலையில் இருந்ததால் பெற்றோர், தங்களது குழந்தைகளை அங்கன்வாடி மையத்திற்கு அனுப்ப மறுத்துவிட்டனர்.

இதையடுத்து, கடந்த 2015-16ல் ஒருங்கிணைந்த குழந்தைகள் வளர்ச்சி திட்டத்தின் கீழ் ₹42 ஆயிரம் மதிப்பில் கட்டிடத்தை புதுப்பித்தனர். தற்போது அங்கன்வாடி மைய கட்டிடத்தின் மேற்கூரை மீண்டும் பழுதடைந்து, சிமெண்ட் பூச்சு பெயர்ந்து கீழே விழுவது வாடிக்கையாக உள்ளது. மேற்கூரை விழுந்து அசம்பாவிதம் ஏற்படும் முன்பாக, பழுதடைந்த மையத்தை சீரமைக்க வேண்டும். இவ்வாறு மனுவில் தெரிவிக்கப்பட்டுள்ளது.