புதுச்சேரியில் மாஸ்க் அணிவதை கட்டாயமாக்க வேண்டும்

காரைக்கால், ஜன.5: கொரோனா 3வது அலைக்கான எச்சரிக்கை விடப்பட்டுள்ள சூழ்நிலையில், புதுச்சேரியில் கோவிட் பரவலை கட்டுப்படுத்தும் நடவடிக்கையாக முகக்கவசம் அணிவதை கட்டாயமாக்கும்படி துணைநிலை ஆளுநர் டாக்டர் தமிழிசை செளந்தரராஜன் அறிவுறுத்தி உள்ளார். நாடு முழுவதும் ஒமிக்ரான் வகை கொரோனா பரவி வரும் சூழ்நிலையில் அதனை எதிர்கொள்வதற்கான முன்னேற்பாடுகள் மற்றும் மருத்துவக் கட்டமைப்பினை மேம்படுத்த பிரதமர் அறிவுறுத்தியுள்ள நிலையில் புதுச்சேரி கோவிட் மேலாண்மை உயர்நிலைக்குழு கூட்டம் துணைநிலை ஆளுநர் மாளிகையில் நடைபெற்றது. கூட்டத்திற்கு துணை நிலை ஆளுநர் டாக்டர். தமிழிசை சௌந்தரராஜன் தலைமை தாங்கினார். வளர்ச்சி ஆணையர் பிரசாந்த் கோயல், சுகாதாரத்துறை செயலர் உதயகுமார், செய்தித்துறை செயலர் வல்லவன், துணைநிலை ஆளுநரின் செயலர் அபிஜித் விஜய் சௌதரி, சுகாதாரத்துறை இயக்குனர் டாக்டர் ராமுலு, கோவிட் தலைமை அதிகாரி டாக்டர் ரமேஷ், உலக சுகாதார நிறுவனத்தின் புதுச்சேரி பிரதிநிதி டாக்டர் சாய்ராபானு மற்றும் தனியார் மருத்துவக் கல்லூரிகளின் பிரதிநிதிகள் கூட்டத்தில் கலந்து கொண்டனர்.

புதுச்சேரி மாநிலத்தில் நிலவும் தற்போதைய கொரோனா நிலவரம் குறித்து சுகாதாரத்துறை இயக்குனர் டாக்டர் ராமுலு படக்காட்சி மூலம் விளக்கினார். தொடர்ந்து துணை நிலை ஆளுநர் டாக்டர் தமிழிசை சௌந்தரராஜன் உரையாற்றினார். அவர் பேசியதாவது: கொரோனா 3வது அலைக்கான எச்சரிக்கை விடுக்கப்பட்டுள்ள சூழ்நிலையில், புதுச்சேரியில் கோவிட் பரவலை கட்டுப்படுத்துவதற்கான அனைத்து நடவடிக்கைகளையும் தீவிரப்படுத்த வேண்டும். புதுச்சேரியில் முகக்கவசம் அணிவதை கட்டாயமாக்க வேண்டும். மருத்துவமனைகளில் கொரோனா சிகிச்சையுடன் பிற அவசிய சிகிச்சை மற்றும் அறுவை சிகிச்சைகளையும் செய்வதற்கான நடவடிக்கைகளை எடுக்க வேண்டும். இவ்வாறு அவர் பேசினார்.

Related Stories: