தேர்தலில் போட்டியிடும் வேட்பாளரின் குற்றப்பின்னணி, கல்வி தகுதியை தெரிந்துகொள்ளலாம்: தேர்தல் ஆணையம் புதிய தளம் உருவாக்கம்

சென்னை: தேர்தலில் போட்டியிடும் வேட்பாளரின் கல்வி தகுதிகள் மற்றும் குற்றப் பின்னணிகளை தெரிந்துகொள்ள தேர்தல் ஆணையம் புதிய தளத்தை உருவாக்கியுள்ளது. இதுகுறித்து இந்திய தேர்தல் ஆணையம் நேற்று வெளியிட்டுள்ள அறிக்கை:
1. அசாம், கேரளா, புதுச்சேரி, தமிழ்நாடு மற்றும் மேற்குவங்க சட்டப்பேரவைகளுக்கான பொதுத்தேர்தல் மற்றும் கோவா, குஜராத், கர்நாடகா, மகாராஷ்டிரா, நாகாலாந்து மற்றும் திரிபுரா ஆகிய மாநிலங்களில் உள்ள 8 சட்டப்பேரவை தொகுதிகளுக்கான இடைத்தேர்தல் அட்டவணையை இந்திய தேர்தல் ஆணையம் கடந்த மார்ச் 15ம் தேதி அறிவித்தது.
2. வருகிற 9ம் தேதி வாக்குப்பதிவு நடைபெறவுள்ள அசாம், கேரள மாநிலங்கள் மற்றும் புதுச்சேரி யூனியன் பிரதேசத்தின் சட்டப்பேரவை தேர்தல்கள் மற்றும் 4 மாநிலங்களில் நடைபெறும் இடைத்தேர்தல்களில் மொத்தம் 1,955 வேட்பாளர்கள் களத்தில் உள்ளனர்.
3. மேற்குவங்கம் (கட்டம்-I மற்றும் II) மற்றும் தமிழ்நாடு சட்டப்பேரவை தேர்தல்களுக்கான வேட்புமனு தாக்கல் தொடங்கியுள்ளது. வேட்புமனுக்களை திரும்பப் பெறுவதற்கான கடைசி நாள் தமிழ்நாடு மற்றும் மேற்குவங்கத்திற்கு (கட்டம்-I) ஏப்ரல் 9ம் தேதியும், மேற்கு வங்கத்திற்கு (கட்டம்-II) ஏப்ரல் 13ம் தேதி ஆகும்.
4. வேட்பாளர்களின் குற்றவியல் வழக்குகள், சொத்துகள் மற்றும் கடன்கள், கல்வித் தகுதிகள் மற்றும் வேட்பாளர்களின் அதிகாரப்பூர்வ சமூக ஊடக கணக்குகள் பற்றிய தகவல்களை பெற குடிமக்கள் ECINet-ன் ‘உங்கள் வேட்பாளரை தெரிந்துகொள்ளுங்கள் KYC’ தொகுதியை பயன்படுத்தலாம்.
5. பயனர்கள் ECINet-ன் ‘தேர்தல் நடத்தை (Conduct of Elections)’ பகுதியின் கீழ் KYC தொகுதியை அணுகலாம். வேட்பாளர்கள் சமர்ப்பித்த முழுமையான உறுதிமொழிப் பத்திரத்தையும் (படிவம் 26) அவர்கள் ECINet மூலம் பதிவிறக்கம் செய்யலாம்.
6. ECINet என்பது உலகின் மிகப்பெரிய ஜனநாயகத்தின் அனைத்து தேர்தல் சேவைகளையும் ஒரே தடையற்ற தளத்தில் ஒருங்கிணைக்கும் உலகின் மிகப்பெரிய தேர்தல் சேவை தளமாகும். இது இந்திய தேர்தல் ஆணையத்தின் 40-க்கும் மேற்பட்ட செயலிகள் மற்றும் இணையதளங்களை ஒருங்கிணைக்கிறது.
7. ECINet வாக்காளர்களுக்கு வாக்காளர் பதிவு, வாக்காளர் பட்டியல் தேடல், உங்கள் விண்ணப்பங்களை கண்காணித்தல், தேர்தல் அதிகாரிகளுடன் தொடர்புகொள்ளுதல், வாக்குச்சாவடி நிலை அலுவலருடன் அழைப்பை முன்பதிவு செய்தல், எப்பிக் பதிவிறக்கம், வாக்குப்பதிவு போக்குகள் மற்றும் குறைகளை தீர்ப்பது போன்ற சேவைகளை ஒரே பாதுகாப்பான தளத்தில் வழங்குகிறது.
8. இது நிகழ்நேர தகவல் அணுகல் மற்றும் புகார் தீர்வுக்கான ஒற்றைச் சாளர தளத்தையும் வழங்குகிறது. இதில் விதிமீறல்களை புகாரளிக்க சி-விஜில் மற்றும் மாற்றுத்திறனாளிகளுக்கான அணுகக்கூடிய தேர்தல் சேவைகளை உறுதி செய்ய Saksham போன்ற கருவிகளும் அடங்கும். இவ்வாறு அதில் கூறப்பட்டுள்ளது.