வேலூர், பிப்.16: சமையல் கேஸ் விலை திடீரென ₹50 உயர்த்தப்பட்டதன் மூலம் வேலூர் மாவட்டத்தில் சமையல் கேஸ் விலை ₹800ஐ தாண்டியிருப்பது நுகர்வோரை அதிர்ச்சியில் ஆழ்த்தியுள்ளது. இந்தியாவில் தற்போதைய நிலையில் 27.78 கோடி பேர் வீட்டு உபயோக சமையல் கேஸ் இணைப்பு பெற்றுள்ளனர். இவர்களுக்கான சமையல் கேஸ் சிலிண்டர்களை பொதுத்துறை நிறுவனங்களான இந்தியன் ஆயில் நிறுவனம், பாரத் பெட்ரோலியம், இந்துஸ்தான் பெட்ரோலியம் ஆகிய 3 நிறுவனங்கள் சப்ளை செய்கின்றன. தமிழகத்தில் ஏறத்தாழ 1 கோடி சமையல் கேஸ் நுகர்வோர்கள் உள்ளனர். கடந்த மாதம் வரை தமிழகத்தில் சென்ைன தொடங்கி கன்னியாகுமரி வரை 3 நிறுவனங்களின் சார்பிலும் ஏறத்தாழ ₹750 முதல் 780 வரை கேஸ் சிலிண்டர் வினியோகிக்கப்பட்டது. தற்போது ₹50 விலை உயர்த்தப்பட்டிருப்பதால் கேஸ் சிலிண்டரின் விலை ₹800ஐ தாண்டி உள்ளது. இந்த விலையுடன் வீடுகளுக்கு சப்ளை செய்யப்படுவதற்காக சர்வீஸ் சார்ஜ் எனப்படும் ₹50 உடன் சேர்த்து வாடிக்கையாளர்கள் ₹900ம் வரை கேஸ் ஏஜென்சிகளுக்கு செலுத்த வேண்டிய நிலை ஏற்பட்டுள்ளது.

இது ஒருபுறம் என்றால் ஏற்கனவே நாடு முழுவதும் ஆண்டு வருமானம் ₹10 லட்சத்துக்கு மேல் வருவாய் உடைய 1.5 கோடி குடும்பங்களுக்கு கேஸ் மானியம் ரத்து செய்யப்பட்டுள்ளது. வரும் ஏப்ரலில் மேலும் 18 கோடி பேருக்கு மானியம் ரத்தாகும் என்ற தகவலும் கேஸ் நிறுவனங்களில் இருந்து வெளியாகியுள்ளது. இதுதொடர்பாக வேலூரை சேர்ந்த சமையல் கேஸ் வினியோகஸ்தர்களிடம் கேட்டபோது, ‘சமையல் கேஸூம் பெட்ரோல், டீசல் விலை போன்றே சென்னை தொடங்கி கன்னியாகுமரி வரை அடிப்படை விலையில் மாறுபாடு இருக்கும். இந்த அடிப்படை விலையுடன் ₹50 உயர்த்தப்பட்டிருப்பதால் கேஸ் சிலிண்டரின் விலை ₹800ஐ தாண்டும். அதேபோல் எங்களுக்கு கிடைத்த தகவலின்படி வரும் ஏப்ரல் மாதம் கேஸ் மானியத்தை மத்திய அரசு முழுமையாக ரத்து செய்யும் என்று தெரிகிறது. இதற்கு காரணமாக இதில் கிடைக்கும் கூடுதல் நிதியை கொரோனாவுக்காக மத்திய அரசு செலவிட்ட தொகையை ஈடுகட்ட இருப்பதாக கூறப்படுகிறது’ என்றனர்.