சென்னை: உலகம் முழுவதும் இன்று 2026 ஆங்கில புத்தாண்டு வெகுவிமரிசையாக கொண்டாடப்பட்டு வருகிறது. தமிழ் படவுலகின் முன்னணி நடிகர் ரஜினிகாந்த் சென்னையில் இருந்தால், ஜனவரி 1ம் தேதி சென்னை போயஸ் கார்டனிலுள்ள தனது வீட்டு முன்பு கூடியிருக்கும் ரசிகர், ரசிகைகளை நேரில் சந்தித்து புத்தாண்டு வாழ்த்து சொல்வது வழக்கம். அதன்படி இன்று காலை 9 மணியளவில் தனது வீட்டு முன்பு திரண்ட ரசிகர்களுக்கு ஆங்கில புத்தாண்டு வாழ்த்து சொன்ன ரஜினிகாந்த், அங்கு கூடியிருந்தவர்களை நோக்கி கையெடுத்து கும்பிட்டார்.
பிறகு தனது எக்ஸ் தளத்தில் ரஜினிகாந்த் வெளியிட்ட பதிவில், தனது நடிப்பில் வெளியான ‘முத்து’ என்ற படத்தில் இடம்பெற்ற வசனத்தை வெளியிட்டு புத்தாண்டு வாழ்த்து சொல்லியிருக்கிறார். சாரட் வண்டியில் ரஜினிகாந்துடன் அமர்ந்திருக்கும் மீனா, ‘போற ரூட் கரெக்ட்டுதான?’ என்று கேட்பார். அதற்கு ரஜினிகாந்த், ‘யாருக்கு தெரியும்? நான் எப்பவும் போற ரூட் பத்தி கவலைப்பட்டது கிடையாது. ஆண்டவன் மேல பாரத்தை போட்டு, வண்டி எந்த ரூட்டில் போகுதோ, அந்த ரூட்ல போயிட்டே இருக்க வேண்டியதுதான்’ என்று காட்சி அமைந்திருக்கும். இதுவரை எந்த வருடமும் அவர் இதுபோல் வசனத்தை வெளியிட்டு புத்தாண்டு வாழ்த்து சொன்னதில்லை என்பதால், இன்று அவர் வெளியிட்டுள்ள பதிவு குறித்து ரசிகர்கள் பரபரப்பாக பேசி வருகின்றனர்.
