மதுரை, டிச. 30:  மதுரை நரிமேடு பகுதியில் நேற்று நடந்த மக்கள் கிராம சபை கூட்டத்திற்கு திமுக பொறுப்புக்குழு உறுப்பினர்கள் எஸ்ஸார் கோபி, வேலுசாமி, பொன்.சேதுராமன், தமிழரசி தலைமை வகித்தனர்.  வட்டச்செயலாளர் ஆபீத் வரவேற்றார். பகுதிச்செயலாளர்கள் ராதாகிருஷ்ணன், அக்ரிகணேசன், துணைச்செயலாளர் ரத்தினவேல், பொறியாளர் அணி அமைப்பாளர் சாகுல்ஹமீது முன்னிலை வகித்தனர். கூட்டத்தில் பங்கேற்ற பெண்கள், ‘குடிநீர் இல்லை. சாலை மோசமாக உள்ளது. ரேசன் அரிசி சரியில்லை. கொரோனா காலத்தில் ரூ.1000 கொடுத்து விட்டு, மறுவாரமே மதுக்கடைகளை திறந்து விட்டனர்’ என அதிமுக ஆட்சி மீது சரமாரி குற்றம்சாட்டினர்.தொடர்ந்து, மாநகர் வடக்கு மாவட்ட பொறுப்பாளர் பொன்.முத்துராமலிங்கம் பேசுகையில், ‘அதிமுக ஆட்சியில் கான்டிராக்ட் விட்டு லட்சோபலட்சம் ேகாடி கொள்ளையடிக்கிறார்கள். குடிக்க தண்ணீர் இல்லை. ஆனால் டாஸ்மாக்கை திறந்து விட்டனர். அந்தளவுக்கு மோசமான ஆட்சி நடக்கிறது. 10 ஆண்டுகால ஆட்சி மாற திமுகவுக்கு வாக்களித்து, ஸ்டாலினை முதல்வராக்குங்கள்’ என்றார்.

*அய்யர்பங்களாவில் நடந்த மக்கள் கிராமசபை கூட்டத்திற்கு மாவட்ட அவைத்தலைவர் பாலசுப்பிரமணியன்  தலைமை வகித்தார்.  பொருளாளர் சோமசுந்தரபாண்டியன், இளைஞரணி அமைப்பாளர்  ஜி.பி.ராஜா, மாணவரணி அமைப்பாளர் மருதுபாண்டி முன்னிலை வகித்தனர். ஒன்றிய  செயலாளர் சிறைச்செல்வன், மேற்கு ஒன்றிய சேர்மன் வீரராகவன் வரவேற்றனர்.  கூட்டத்தில் வடக்கு மாவட்ட செயலாளர் மூர்த்தி எம்எல்ஏ பேசுகையில், ‘அதிமுக ஆட்சியில் வேலைக்காக பணத்தை கொடுத்து, பல இடங்களில் மக்கள் ஏமாந்துள்ளனர். நாடாளுமன்ற தேர்தலின் போது, 100 நாள் வேலைத்திட்டத்தை 150 நாளாக்குவோம் என கொடுத்த வாக்குறுதியை இதுவரை நிறைவேற்றவில்லை. இப்போதுள்ள ஆட்சியில் பதவிச்சண்டை, கான்டிராக்ட் விட்டு கொள்ளையடிப்பது என நடந்து வருகிறது. கொரோனா காலத்தில் ஆளும்கட்சி செய்யாத நிவாரண உதவியை திமுக செய்தது. 10 ஆண்டு மக்கள் பட்ட சிரமங்கள் மாறுவதற்கு ஒரேவழி திமுகவை ஆட்சியில் அமர்த்துவதுதான்’ என்றார்.