துறையூர், டிச.28: துறையூர் பகுதியில் முதல்வர் பிரசார இடத்தை பார்வையிட்டுவிட்டு செல்லும்போது அதிமுக கட்சி நிர்வாகிகள் கார்கள் ஒன்ேறாடு ஒன்று மோதிக்கொண்டு விபத்துக்குள்ளானது. இதில் 3 பேர் படுகாயமடைந்தனர்.

துறையூர் பகுதிக்கு தேர்தல் பிரசாரத்திற்காக முதல்வர் எடப்பாடி பழனிச்சாமி வரும் 30ம் தேதி வருவதாக அறிவிக்கப்பட்டது. இதையடுத்து அவர் பிரசாரம் செய்யும் இடங்களை பார்வையிடுவதற்காக திருச்சி வடக்கு மாவட்ட அதிமுக செயலாளர் பரஞ்சோதி முசிறி வழியாக கண்ணனூர் வந்தார். கண்ணனூரில் முதல்வர் பிரசாரம் செய்யும் இடத்தை பார்வையிட்டுவிட்டு துறையூர் நோக்கி வரும்போது கொத்தம்பட்டி காலனி அருகே அவர் பின்னால் வந்த கார்கள் ஒன்றை ஒன்று முந்தி செல்லும்போது எதிர்பாராத விதமாக ஒன்றுடன் ஒன்று மோதி விபத்துக்குள்ளானது. இதில் கட்சி நிர்வாகிகள் மனோகரன், பாலசுப்ரமணியன், கார் டிரைவர் கோபி ஆகியோர் படுகாயமடைந்தனர்.

காயம் அடைந்தவர்கள் ஆம்புலன்ஸ் மூலம் துறையூர் தனியார் மருத்துவமனையில் சேர்க்கப்பட்டு, பின்னர் மேல் சிகிச்சைகாக திருச்சி தனியார் மருத்துவமனைக்கு அனுப்பி வைக்கப்பட்டனர். இதனால் அப்பகுதியில் அரை மணி நேரம் போக்குவரத்து பாதிக்கப்பட்டது. தகவலறிந்து வந்த ஜெம்புநாதபுரம் போலீசார் போக்குவரத்தை சீர் செய்தனர். இது குறித்து வழக்குகள் பதியவில்லை. மாவட்ட செயலாளர் கார் பின்னால் வந்த கட்சியினரின் கார்கள் ஒன்றுடன் ஒன்றுடன் மோதி விபத்துக்குள்ளானது அப்பகுதியில் பரபரப்பை ஏற்படுத்தியது.