மணப்பாறை பிப்.13: மணப்பாறையை அடுத்த கொட்டப்பட்டியில் அரசு ஆரம்ப சுகாதார நிலையம் அமைக்க அமைச்சர்கள் வளர்மதி, விஜயபாஸ்கர் ஆகியோருக்கு பரிந்துரை கடிதம் அனுப்பப்பட்டுள்ளது. மணப்பாறையை அடுத்த மொண்டிப்பட்டி ஊராட்சியை சேர்ந்தது கொட்டப்பட்டி கிராமம். மொண் டிப்பட்டி, கலிங்கப்பட்டி, தொப்பம்பட்டி உள்ளிட்ட 3 ஊராட்சிகளின் மையமாக இது அமைந்துள்ளது. இந்த 3 ஊராட்சிகளிலும் 50க்கும் மேற்பட்ட கிராமங்கள் அமைந்துள்ளன. இப்பகுதியில் 30 ஆயிரத்திற்கும் மேற்பட்டோர் வசித்து வருகின்றனர். இது தவிர தமிழ்நாடு செய்தித்தாள் காகித நிறுவனம் இந்த ஊரின் அருகில் அமைந்துள்ளது. இந்த நிறுவனங்களுக்கு செல்லும் கனரக வாகனங்களால் அடிக்கடி விபத்துகள் ஏற்படுகிறது. விபத்துகளில் பாதிக்கப்பட்டவர்களை 10 கி.மீ. தூரம் உள்ள மணப்பாறை அரசு மருத்துவமனைக்கு அழைத்து செல்ல வேண்டி உள்ளது.