ஈரோடு, டிச.13: உள்ளாட்சி தேர்தல் தொடர்பான புகார்களை பெற ஈரோட்டில் தேர்தல் கட்டுப்பாட்டு அறை துவங்கப்பட்டுள்ளது என எஸ்பி சக்தி கணேசன் கூறினார். இதுகுறித்து அவர் நேற்று மேலும் கூறியதாவது: ஈரோடு மாவட்டத்தில் உள்ளாட்சி தேர்தலுக்காக 1,576 வாக்குசாவடிகள் அமைக்கப்பட்டுள்ளது. இதில், பதட்டமான வாக்குசாவடிகளில் சிசிடிவி கேமரா பொருத்தி கண்காணிக்கப்படும். மாவட்டத்தில் 18 வாக்கு எண்ணிக்கை மையம் அமைக்கப்பட உள்ளது. அங்கும், அனைத்து நிகழ்வுகளையும் கண்காணிக்க சிசிடிவி கேமரா அமைக்கப்படும். மக்களவை தேர்தலின் போது, பழங்குற்றவாளிகள் 625 பேரை முன்னெச்சரிக்கை நடவடிக்கையாக கைது செய்தோம். அதேபோல், தற்போது நடைபெறும் உள்ளாட்சி தேர்தலிலும் நன்னடத்தை விதிகளை மீறியவர்கள் மற்றும் மக்களுக்கு அச்சுறுத்தலை ஏற்படுத்தும் குற்றவாளிகளை முன்னெச்சரிக்கையாக கைது செய்து, ஆர்டிஓ., உத்தரவின் பேரில் சிறையில் அடைக்க நடவடிக்கை எடுத்து வருகிறோம்.