மானூர், டிச.12: மானூர் அருகே குத்தாலப்பேரியில் குடியிருப்பு அருகே தேங்கி நிற்கும் கழிவுநீர் குட்டையால் நோய்கள் பரவும் அபாயம் ஏற்பட்டுள்ளது. மானூர் ஒன்றியம் மாவடி ஊராட்சி குத்தாலப்பேரி கிராமத்தில் 100க்கும் மேற்பட்ட குடியிருப்புகள் உள்ளன. இங்குள்ளவர்கள் கூலித்தொழில் மற்றும் விவசாய தொழிலாளர்கள். குடியிருப்பு பகுதியில் பெரிய பள்ளம் உள்ளது. வீடுகளில் இருந்து வெளியேறும் கழிவுநீரை வெளியேற்ற வாறுகால் அமைப்பதாக கூறி நீர்ப்போக்கினை இக்குழியில் வந்து இணைத்ததால் தற்போது கழிவுநீர் குட்டையாக மாறியது. மேலும் இதன் அருகிலேயே கழிவுகள் கொட்டப்படுவதால் துர்நாற்றம் வீசுகின்றன. இப்பகுதியில் கோயில்கள், சிறுவர்கள் விளையாடும் பகுதியுள்ளது. தேங்கி நிற்கும் கழிவுநீரில் கொசுக்கள் உற்பத்தியாவதால் பல்வேறு நோய்களால் பொதுமக்கள் பாதிக்கப்படுகின்றனர். இப்பகுதி சிறுவர்கள் விளையாடும் போது குட்டையில் விழும் அபாயமும் உள்ளது. மேலும் இப்பகுதியில் கடந்த ஆண்டு கட்டப்பட்ட குடிநீர் தரைமட்ட தொட்டியையும் பயன்படுத்த முடியாத நிலையும் ஏற்பட்டுள்ளது.எனவே குட்டையில் தேங்கியுள்ள கழிவுநீரை அகற்றி, அதனை சரள்மண் போட்டு நிரப்ப வேண்டும். மேலும் ஊரின் மையப்பகுதியில் பஞ்சாயத்து கிணறு பராமரிப்பின்றி தண்ணீர் நிறைந்து திறந்தநிலையில் உள்ளது. அதனை பயன்படுத்தவும், பாதுகாப்பிற்காக மூடி அமைத்து தரவேண்டுமெனவும் பொதுமக்கள் கோரிக்கை விடுத்துள்ளனர்.