தஞ்சை, நவ. 19: கடந்த ஏப்ரல் மாதம் முதல் நிலுவையில் உள்ள ஓய்வுகால பணப்பலன்களை உடனடியாக வழங்க வேண்டுமென கும்பகோணம், நாகை அரசு போக்குவரத்து கழக ஏஐடியூசி ஓய்வூதியர்கள் சங்கம் வலியுறுத்தியது. தஞ்சை மாவட்ட ஏஐடியூசி அலுவலகத்தில் கும்பகோணம், நாகை அரசு போக்குவரத்து கழக ஏஐடியூசி ஓய்வூதியர்கள் சங்க நிர்வாக குழு கூட்டம் நடந்தது. சங்க தலைவர் தியாகராஜன் தலைமை வகித்தார். ஓய்வூதியர்களின் நிலைமைகள், சம்மேளன முடிவுகள் குறித்து மாநில துணை தலைவர் துரை.மதிவாணன் பேசினார். கூட்டத்தில் போக்குவரத்து கழகங்களில் பணிபுரிந்து ஓய்வு பெற்றவர்களுக்கு கிராஜூட்டி, வருங்கால வைப்பு நிதி தொகை, விடுப்பு சம்பளம், பென்சன் ஒப்படைப்பு தொகை உள்ளிட்ட ஓய்வுகால பணப்பலன்கள் கடந்த ஏப்ரல் மாதம் முதல் வழங்கவில்லை. இதனால் பெரும் துன்பத்தில் உள்ள ஓய்வூதியர்களுக்கு உடனடியாக ஓய்வுகால பணப்பலன்களை காலம் தாழ்த்தாது வழங்க வேண்டும். 45 நாட்களில் வழங்கப்படுவதாக அறிவிக்கப்பட்ட உயர்த்தப்பட்ட பழைய மற்றும் புதிய அகவிலைப்படியை நிலுவைத்தொகையுடன் உடனடியாக வழங்க வேண்டும்.