தூத்துக்குடி, செப். 15: தூத்துக்குடியில் எஸ்டிஆர் சிலை திறப்பு விழாவில் பங்கேற்ற தமாகா தலைவர் ஜி.கே.வாசன், நிருபர்களுக்கு அளித்த பேட்டி: இந்தியாவில் 8வது அட்டவணையில் உள்ள அனைத்து மொழிகளையும் ஒரே நிலையில் ஏற்றுக் கொள்ளப்பட வேண்டும். இந்தியை கட்டாயமாக்குவது என்பது மக்களின் விருப்பமாக ஒருபோதும் இருக்க முடியாது. தாய் மொழி தமிழ், பயிற்று மொழி ஆங்கிலம் தவிர மூன்றாவது மொழியாக விருப்பமிருந்தால் எந்த மொழியையும் படிக்கலாம் என்பதுதான் தமாகாவின் நிலைப்பாடு.தமிழகத்தில் டிஜிட்டல் பேனர் கலாசாரத்திற்கு முற்றுப்புள்ளி வைக்க வேண்டும் என்பதில் மாற்றுக் கருத்து கிடையாது. இத்தொழிலை நம்பி லட்சக்கணக்கானோர் வாழ்கின்றனர். நகரம், மாநகர பகுதிகளில் பிரதான சாலைகள், மக்கள் அதிகமாக கூடும் இடங்களில் பேனர் வைக்க அனுமதிக்ககூடாது. எனவே, மக்களை பாதிக்காத வகையில் அதை அரசு அதிகாரிகள் முறைப்படுத்த வேண்டும். இத்தொழிலில் ஈடுபட்டுள்ளவர்களுக்கு மறுவாழ்வு தேவை என்பதால் மக்களுக்கு பாதிப்பு ஏற்படாத வகையில் அதனை முறைப்படுத்த வேண்டும்.