பூலாம்பட்டி காவிரியில் 3வது நாளாக படகு போக்குவரத்து நிறுத்தம் பயணிகள் கடும் அவதி

இடைப்பாடி, செப்.10: காவிரியில் நீர்திறப்பு அதிகரிக்கப்பட்டுள்ளதால், பூலாம்பட்டி காவிரியில் நேற்று 3வது நாளாக படகு போக்குவரத்து நிறுத்தப்பட்டது. இதனால், பயணிகள் கடும் அவதிக்குள்ளாகினர். மேட்டூர் அணை முழுமையாக நிரம்பியுள்ள நிலையில், அணைக்கு வரும் உபரிநீர் அப்படியே காவிரி ஆற்றில் வெளியேற்றப்பட்டு வருவதால், கரையோர மக்களுக்கு வெள்ள அபாய எச்சரிக்கை விடுக்கப்பட்டுள்ளது. அணையில் இருந்து விநாடிக்கு 60 ஆயிரம் கனஅடிக்கும் அதிகமாக தண்ணீர் வெளியேற்றப்பட்டு வரும் நிலையில், நேற்றிரவு 70 ஆயிரம் கனஅடியாக அதிகரிக்கப்பட்டுள்ளது. திறப்பு அதிகரிப்பால், சேலம் மாவட்டம் பூலாம்பட்டி பகுதியில், காவிரியின் இரு கரைகளையும் தொட்டவாறு தண்ணீர் பெருக்கெடுத்துச் செல்கிறது. இதனால், பூலாம்பட்டியில் விசைப்படகு போக்குவரத்து நிறுத்தப்பட்டுள்ளது. பூலாம்பட்டி-ஈரோடு மாவட்டம் நெறிஞ்சிப்பேட்டை இடையே, காவிரி ஆற்றில் விசைப்படகு போக்குவரத்து நிறுத்தப்பட்டுள்ளதால், பயணிகள் கடும் அவதிக்குள்ளாகி உள்ளனர். நேற்று 3வது நாளாக போக்குவரத்து நடைபெறாததால், படகுகள் அனைத்தும் கரையோரம் நிறுத்தி வைக்கப்பட்டிருந்தது. விசைப்படகு போக்குவரத்து நிறுத்தப்பட்டுள்ளதால், இரு மார்க்கத்திலும் சுமார் 3 கி.மீ., தொலைவிற்கு நடந்தும், டூவீலர்களிலும் சென்று வருகின்றனர். மேலும், காவிரி கரையில் வருவாய்த்துறை மற்றும் பொதுப்பணித்துறையினர் கண்காணிப்பு பணியை முடுக்கி விட்டுள்ளனர்.

Advertising
Advertising

Related Stories: